എരുമപ്പെട്ടി: ശ്രീലങ്കയില്‍ നടക്കുന്ന അന്താരാഷ്ട്ര യോഗ പരിശീലനത്തില്‍ പങ്കെടുക്കാന്‍ അവസരം ലഭിച്ചിട്ടും യാത്രക്ക് പണമില്ലാതെ സുമനസ്സുകളുടെ സഹായം തേടുകയാണ് ജിസ്മി ആന്‍ഡ്രൂസ്. തൃശൂര്‍ എരുമപ്പെട്ടി മങ്ങാട് പുത്തൂര്‍ വീട്ടില്‍ ആന്‍ഡ്രൂസ് ലിസി ദമ്പതികളുടെ ഇളയ മകളായ ജിമ്മി കേരളത്തില്‍ നിന്ന് അന്താരാഷ്ട്ര തലത്തിലേക്ക് തിരഞ്ഞെടുക്കപ്പെട്ട 12 പേരില്‍ ഒരാളാണ്. സ്‌കൂള്‍ ഗെയിംസ് ആന്റ് ആക്ടിവിറ്റി ഡെവലപ്‌മെന്റ് ഫൗണ്ടേഷന്‍ നോയിഡയില്‍ സംഘടിപ്പിച്ച നാലാമത് ദേശീയ യോഗ ചാംപ്യന്‍ഷിപ്പില്‍ സ്വര്‍ണം നേടിയാണ് ജിസ്മി അന്താരാഷ്ട്ര തലത്തിലേക്ക് തിരഞ്ഞെടുക്കപ്പെട്ടത്.
അപൂര്‍വ നേട്ടത്തെ കൈവരിക്കാന്‍ കഠിനമായി പരിശീലിക്കുന്നുണ്ടൈങ്കിലും യാത്രക്കാവശ്യമായ ഭീമമായ തുക കണ്ടെത്താന്‍ കഴിഞ്ഞിട്ടില്ല. സ്വകാര്യ സ്ഥാപനത്തില്‍ ജീവനക്കാരനായ പിതാവ് ആന്‍ഡ്രൂസ് മകളുടെ സ്വപ്ന സാക്ഷാത്ക്കാരത്തിനായി നെട്ടോട്ടമോടുകയാണ്. തൃശൂര്‍ സെന്റ് തോമാസ് കോളജില്‍ ബികോം വിദ്യാര്‍ഥിനിയായ ജിസ്മിയുടേയും സഹോദരിയുടേയും വിദ്യാഭ്യാസ ചെലവിനായി ബാങ്കില്‍ നിന്ന് വായ്പയെടുത്തിരിക്കുകയാണ്. ഇത് തിരിച്ചടക്കാനും നിത്യ ചെലവുകള്‍ക്കും ബുദ്ധിമുട്ടനുഭവിക്കുന്നതിനിടയിലാണ് മകള്‍ക്ക് അപ്രതീക്ഷിത സൗഭാഗ്യം കൈവന്നത്. അസാധാരണ മെയ് വഴക്കത്തോടെ യോഗ സായത്ത്വമാക്കിയ ജിസ്മി തന്റെ സ്വപ്നം യാഥാര്‍ഥ്യമാകുമെന്ന പ്രതീക്ഷയില്‍ ഇപ്പോഴും പരിശീലനത്തിലാണ്. തന്റെ മകളെ സഹായിക്കാന്‍ സന്‍മനസുള്ളവര്‍ വരുമെന്ന പ്രതീക്ഷയിലും പ്രാര്‍ഥനയിലുമാണ് ആന്‍ഡ്രുസും ഭാര്യ ലിസിയും.