കൊല്ലം: നവജാത ശിശുവിനെ കുറ്റിക്കാട്ടില്‍ മരിച്ചനിലയില്‍ കണ്ടെത്തിയ സംഭവത്തില്‍ മാതാവിനെ പൊലിസ് അറസ്റ്റ് ചെയ്തു. പുത്തൂര്‍ സ്വദേശി അമ്പിളിയാണ് അറസ്റ്റിലായത്. പ്രസവിച്ച ഉടനെ കുഞ്ഞിനെ കൊന്ന് കുറ്റിക്കാട്ടില്‍ ഉപേക്ഷിക്കുകയായിരുന്നുവെന്ന് ഇവര്‍ പൊലിസിന് മൊഴി നല്‍കിയിട്ടുണ്ട്. അമ്മയുടെ സഹായത്തോടെയാണ് ഇവര്‍ കുഞ്ഞിനെ കൊന്നത്.

കൊല്ലം പവിത്രേശ്വരം ഗുരുനാഥ ക്ഷേത്രത്തിന് സമീപത്തുള്ള പറമ്പില്‍ നിന്നാണ് കഴിഞ്ഞ ദിവസം കുട്ടിയുടെ മൃതദേഹം കണ്ടത്. കൈകാലുകള്‍ മുറിഞ്ഞ നിലയില്‍ കാണപ്പെട്ട മൃതദേഹം അഴുകിതുടങ്ങിയ നിലയിലായിരുന്നു. തുടര്‍ന്ന് പ്രദേശവാസികളുടെയും ആശാവര്‍ക്കര്‍മാരുടെയും സഹായത്തോടെ പൊലിസ് നടത്തിയ അന്വേഷണത്തിലാണ് അമ്പിളി പിടിയിലായത്. കേസില്‍ അമ്പിളിയുടെ അമ്മ ഉഷ, ഭര്‍ത്താവ് മഹേഷ് എന്നിവര്‍ പൊലിസ് കസ്റ്റഡിയിലാണ്.