തൃശൂര്‍: പൂരം സാംപിള്‍ വെടിക്കെട്ടിനിടെ തീപ്പൊരി തെറിച്ച് ആറു പേര്‍ക്ക് പൊള്ളലേറ്റു.
തമിഴ്‌നാട് പഴനി ഒട്ടന്‍ചത്രം തിരുമലൈ സ്വാമി (63), കാടാമ്പുഴ വെസ്റ്റ് തുടക്കത്തില്‍ പുന്നപ്പുറത്ത് വീട്ടില്‍ വിജയകുമാര്‍ (56), തൃക്കൂര്‍ ചിറമ്മല്‍ ജോണി (59), തിരൂര്‍ ചോലയില്‍ ഹംസ (52), തിരൂര്‍ കടവത്ത് ചെറിയപറമ്പില്‍ ഷാഹുല്‍ ഹമീദ് (43), ബധിരനും മൂകനുമായ മുളയം കുണ്ടുകുളങ്ങര പോളി (52) എന്നിവര്‍ക്കാണ് പരുക്കേറ്റത്. ഇവരെ ജില്ലാ ജനറല്‍ ആശുപത്രിയില്‍ പ്രവേശിപ്പിച്ചു. പൊട്ടിയ ശേഷം റോഡിലേക്കു തെറിച്ചുവീണ വസ്തുവില്‍ നിന്നാണ് പൊള്ളലേറ്റത്. എം.ഒ റോഡില്‍ ഇവര്‍ നില്‍ക്കുന്ന ഭാഗത്തേക്ക് തീപ്പൊരി തെറിക്കുകയായിരുന്നു.
സാരമായി പൊള്ളലേറ്റ തിരുമലൈ സ്വാമി, ഷാഹുല്‍ ഹമീദ്, പോളി എന്നിവരെ മെഡിക്കല്‍ കോളജ് ആശുപത്രിയിലേക്ക് മാറ്റി. ബാക്കിയുള്ളവര്‍ ജനറല്‍ ആശുപത്രിയിലെ പ്രഥമ ശുശ്രൂഷക്കു ശേഷം വീടുകളിലേക്ക് മടങ്ങി.