തിരുവനന്തപുരം: സംസ്ഥാന എന്‍ജിനീയറിങ്, ഫാര്‍മസി പ്രവേശന പരീക്ഷയുടെ ആദ്യദിനത്തില്‍ 1,15,449 പേര്‍ പരീക്ഷയെഴുതി. ഹാജര്‍ 92.11 ശതമാനം. 1,25,332 വിദ്യാര്‍ഥികളാണ് അപേക്ഷിച്ചിരുന്നത്. ഫിസിക്‌സ്, കെമിസ്ട്രി പരീക്ഷയാണ് ഇന്നലെ നടന്നത്. 104,102 പേര്‍ എന്‍ജിനീയറിങ്ങിനും 70,716 വിദ്യാര്‍ഥികള്‍ ഫാര്‍മസി പ്രവേശനപരീക്ഷക്കും അപേക്ഷിച്ചിരുന്നു. സംസ്ഥാനത്തിനകത്തും പുറത്തുമായി 352 കേന്ദ്രങ്ങളാണ് ഒരുക്കിയിരുന്നത്. സംസ്ഥാനത്തിനകത്ത് 349ഉം ഡല്‍ഹി, മുംബൈ, ദുബൈ എന്നിവിടങ്ങളില്‍ ഓരോ കേന്ദ്രവുമാണുള്ളത്. ഇന്നലെ തലസ്ഥാനത്ത് മാത്രം 40 പരീക്ഷാ കേന്ദ്രങ്ങളാണ് ഉണ്ടായിരുന്നത്. ഇന്നു കണക്കുപരീക്ഷ നടക്കും. രാവിലെ 10മുതല്‍ 12.30വരെ നടക്കുന്ന പരീക്ഷക്ക് തലസ്ഥാനത്തുമാത്രം 31 കേന്ദ്രങ്ങളാണ് സജ്ജീകരിച്ചിട്ടുള്ളത്. ഏഴായിരത്തോളം ഉദ്യോഗസ്ഥരെയാണ് പരീക്ഷാ നടത്തിപ്പിനായി നിയോഗിച്ചിരിക്കുന്നത്.