എടവണ്ണ: പ്രാദേശിക വാട്‌സ്ആപ് റേഡിയോ ഒരുക്കി യുവാക്കള്‍ രംഗത്ത്. കാരക്കുന്ന് ചപ്പത്തൊടി പ്രദേശത്തെ സായാഹ്ന ഇരിപ്പിട കേന്ദ്രമാണ് മൂന്നു യുവാക്കള്‍ റേഡിയോ സ്റ്റേഷനാക്കി മാറ്റിയത്. രണ്ടു മൊബൈല്‍ ഫോണുപയോഗിച്ചാണ് ഗില്ലി വാട്‌സ്ആപ് റേഡിയോ പ്രവര്‍ത്തിക്കുന്നത്.
നാട്ടിലെ കുട്ടികള്‍ മുതല്‍ മുതിര്‍ന്നവര്‍ വരെ ഇന്ന് ഗില്ലി വാട്‌സപ് റേഡിയോ ശ്രോതാക്കളാണ്. എന്നും വൈകിട്ട് എട്ടു മുതല്‍ 8.30 വരെ റേഡിയോയില്‍ വിളിക്കുകയും വിശേഷങ്ങള്‍ പങ്കുവയ്ക്കുകയും ചെയ്യാം. കൂടെ ഇഷ്ടഗാനം ആവശ്യപ്പെടുകയും ചെയ്യാം. തുടര്‍ന്ന് അതേ ഇരിപ്പിടത്തില്‍ വച്ച് പാട്ടും സംസാരവും എഡിറ്റ് ചെയ്ത് പ്രാദേശിക വാട്‌സ്ആപ് ഗ്രൂപ്പുകളിലേക്ക് അപ്‌ലോഡ് ചെയ്യും.
പ്രാദേശിക വാര്‍ത്തകളും മറ്റു ആഘോഷ പരിപാടികളുടെ വിവരങ്ങളും വാട്‌സ്ആപ് റേഡിയോയുടെ ഇഷ്ടഗാന പരിപാടിയില്‍ ഉള്‍പ്പെടുത്താറുണ്ട്. സമീര്‍, റഹീം, ശബരീഷ് കെ കാരക്കുന്ന് എന്നിവരാണ് പ്രവര്‍ത്തനങ്ങള്‍ക്ക് നേതൃത്വം നല്‍കുന്നത്. സ്വന്തമായി നാട്ടിലെ വിശേഷങ്ങള്‍ പങ്കുവയ്ക്കാന്‍ കഴിയുന്ന ഒരു പ്രാദേശിക റേഡിയോ ചാനല്‍ പഞ്ചായത്തില്‍ തുടങ്ങണമെന്നാണ് ഇവര്‍ ആഗ്രഹിക്കുന്നത്. ഗില്ലി റേഡിയോയില്‍ പഞ്ചായത്തിലെ എല്ലാവര്‍ക്കും 7356687353 നമ്പറില്‍ വിളിക്കാം.