റിയാദ്: യമനിലെ പ്രമുഖ തുറമുഖമായ ഹുദൈദ തുറമുഖത്തേക്ക് അടുപ്പിക്കാൻ കഴിയാതെ പത്തൊൻപത് എണ്ണക്കപ്പലുകൾ നടുക്കടലിൽ ഹൂതി കസ്റ്റഡിയിൽ. യമനിലെ സഊദി അംബാസിഡർ മുഹമ്മദ് അൽ ജാബിർ ആണ് ഇക്കാര്യം വ്യക്തമാക്കിയത്. യമനിലെ വിമത വിഭാഗമായ ഹൂതികളുടെ കീഴിയിലുള്ള ആയുധ ധാരികളാണ് കപ്പൽ തുറമുഖത്തേക്കടുപ്പിക്കാതെ തടഞ്ഞു വെച്ചിരിക്കുന്നത്. 

 

ഹുദൈദക്കടുത്ത പ്രദേശമായ മുസ്‌തഖഫിലാണ് കപ്പലുകൾ തടഞ്ഞു വെച്ചിരിക്കുന്നത്.  സംഭവത്തിൽ യമൻ കാമ്പ്രാൻസീവ് ഹ്യുമാനിറ്റേറിയൻ സപ്പോർട്ട് സെന്റർ ( വൈ സി എച് ഒ) അഗാധമായ ആശങ്ക അറിയിച്ചിട്ടുണ്ട്. കപ്പലുകൾ തുറമുഖത്തേക്ക് കടത്തിവിടാതെ തടഞ്ഞിരിക്കുകയാണെന്നു അൽ ജാബിർ ട്വീറ്റ് ചെയ്‌തു. 

 

യമനിൽ യുദ്ധത്തിലേർപ്പെട്ടിരിക്കുന്ന ഇറാൻ അനുകൂല ഹൂതികൾ വർഷങ്ങളായിഹുദൈദ തുറമുഖം കൈവശപ്പെടുത്തി വെച്ചിരിക്കുകയാണ്. ഇത് വഴി ആയുധ കടത്തു നടക്കുന്നുണ്ടെന്നും ഹൂതികളുടെ സാമ്പത്തിക സ്രോതസ്സായും പ്രവർത്തിക്കുന്നതായി അംബാസിഡർ പറഞ്ഞു.  തടങ്കലിൽ വെച്ചിരിക്കുന്ന കപ്പലുകൾ ഹൂതികൾ തകർക്കാനിടയായാൽ ചെങ്കടലിലും പരിസരങ്ങളിലും ഗുരുതരമായ പ്രകൃതി ദുരന്തമായിരിക്കും ഫലമെന്ന് അദ്ദേഹം മുന്നറിയിപ്പ് നൽകി. ഏപ്രിൽ മൂന്നിന് അന്താരാഷ്‌ട്ര കപ്പൽ ചാലിൽ വെച്ച് സഊദി എണ്ണക്കപ്പലിനു നേരെ ഹൂതികൾ ആക്രമണം നടത്തിയിരുന്നു. 

---

---