ലണ്ടന്‍: ഇംഗ്ലീഷ് പ്രീമിയര്‍ ലീഗ് പോരാട്ടത്തില്‍ എവര്‍ട്ടന് വിജയം. സ്വന്തം തട്ടകത്തില്‍ നടന്ന മത്സരത്തില്‍ അവര്‍ മറുപടിയില്ലാത്ത ഒറ്റ ഗോളിന് ന്യൂകാസില്‍ യുനൈറ്റഡിനെ കീഴടക്കി. ജയത്തോടെ 45 പോയിന്റുമായി അവര്‍ എട്ടാം സ്ഥാനത്തേക്ക് കയറി.
ന്യൂകാസില്‍ യുനൈറ്റഡിനായി പരിശീലക കുപ്പായത്തില്‍ നൂറാം മത്സരത്തിനിറങ്ങിയ റാഫേല്‍ ബെനിറ്റസിന് മറക്കാന്‍ ആഗ്രഹിക്കുന്ന മത്സരമായി മാറി എവര്‍ട്ടനെതിരായ പോരാട്ടം. കളിയുടെ ആദ്യ പകുതിയില്‍ എവര്‍ട്ടനെ ഗോളടിക്കാന്‍ അനുവദിക്കാതെ പിടിച്ചുനിര്‍ത്തിയ ന്യൂകാസിലിന് പക്ഷേ രണ്ടാം ഘട്ടത്തില്‍ തിയോ വാല്‍ക്കോട്ട് നേടിയ ഗോളിന് മറുപടി നല്‍കാന്‍ കഴിയാതെ പോയി. കളിയുടെ 51ാം മിനുട്ടിലാണ് വാല്‍ക്കോട്ട് ടീമിനായി വല ചലിപ്പിച്ചത്.

ലെവാന്റെയ്ക്ക് ജയം
മാഡ്രിഡ്: സ്പാനിഷ് ലാ ലിഗ പോരാട്ടത്തില്‍ ലെവാന്റെയ്ക്ക് വിജയം. എവേ പോരാട്ടത്തില്‍ അവര്‍ ഒന്നിനെതിരേ മൂന്ന് ഗോളുകള്‍ക്ക് അത്‌ലറ്റിക്ക് ബില്‍ബാവോയെ കീഴടക്കി.

വിജയം സ്വന്തമാക്കി ജനോവ
മിലാന്‍: ഇറ്റാലിയന്‍ സീരി എയില്‍ ജനോവയ്ക്ക് ജയം.
സ്വന്തം തട്ടകത്തില്‍ അരങ്ങേറിയ മത്സരത്തില്‍ അവര്‍ ഹെല്ലാസ് വെറോണയെ ഒന്നിനെതിരേ മൂന്ന് ഗോളുകള്‍ക്ക് പരാജയപ്പെടുത്തി.