തലശ്ശേരി: പൈതൃക നഗരമായ തലശ്ശേരിയുടെ നൂറ്റാണ്ടുകള്‍ നീളുന്ന സമഗ്രമായ ചരിത്രവഴികള്‍ അനാവരണം ചെയ്തുകൊണ്ട് പ്രമുഖ ചിത്രകാരന്‍ പ്രശാന്ത് ഒളവിലം വരച്ച 'തലശ്ശേരി ചിത്രപഥങ്ങള്‍' എന്ന ജലച്ഛായ പ്രദര്‍ശനം തിരുവങ്ങാട്ടെ കേരള ലളിതകലാ അക്കാദമി ഹാളില്‍ ആരംഭിച്ചു.
ഗതകാല തലശ്ശേരിയുടെ ചരിത്രത്തെ ആലേഖനം ചെയ്തുകൊണ്ട് വലിയ കാന്‍വാസുകളില്‍ വരച്ച അറുപത് ചിത്രങ്ങളുടെ പ്രദര്‍ശനം വിഖ്യാത ചിത്രകാരന്‍ കെ.കെ മാരാര്‍ ഉദ്ഘാടനം ചെയ്തു.
തലശ്ശേരിയുടെ ഹൃദയരേഖയായി മാറിയ രചനകള്‍ ജലച്ഛായ രചനാരീതിയുടെ സാധ്യതകളത്രയും ആവാഹിച്ചിട്ടുണ്ടെന്ന് കെ.കെ മാരാര്‍ പറഞ്ഞു.
ചിത്രങ്ങളുടെ പ്രാചീനതയുടെ നിറവും മണവും നൂറ്റാണ്ടുകളിലൂടെ സഞ്ചരിക്കാന്‍ ആസ്വാദകരെ പ്രാപ്തരാക്കുന്നുണ്ട്. ഒരുപാടു കാലത്തെ നിരന്തരമായ അന്വേഷണത്തിന്റെ സാക്ഷാല്‍കാരമാണ് ഈ പ്രദര്‍ശനമെന്ന് ചടങ്ങില്‍ അധ്യക്ഷനായിരുന്ന ഡോ. എ. വത്സലന്‍ പറഞ്ഞു. സുരേഷ് കൂത്തുപറമ്പ്, അസീസ് മാഹി, സി.വി സുധാകരന്‍, ചാലക്കര പുരുഷു, വി.കെ കൂട്ടു, സദു അഴിയൂര്‍, എം. ഹരീന്ദ്രന്‍, പ്രശാന്ത് ഒളവിലം സംസാരിച്ചു.
പ്രദര്‍ശനം മെയ് അഞ്ചിന് സമാപിക്കും.