തളിപ്പറമ്പ്: കഴിഞ്ഞ ദിവസം പിടിയിലായ ഒറ്റനമ്പര്‍ ലോട്ടറി ചൂതാട്ട സംഘത്തിന്റെ തലവന്‍ കാഞ്ഞങ്ങാട് സ്വദേശി അരവിന്ദനെ വലയിലാക്കാന്‍ പൊലിസ് അന്വേഷണം ഊര്‍ജിതമാക്കി.
ചൊവ്വാഴ്ച പിടിയിലായ കാഞ്ഞിരങ്ങാട്ടെ കളപ്പറമ്പില്‍ ജയരാജ് (74), തളിപ്പറമ്പ് സി.എച്ച് റോഡിലെ വി.കെ ഹൗസില്‍ വി.കെ സിദ്ദീഖ് (37), പുളിമ്പറമ്പ് അറഫ മഹലില്‍ സി.പി ഹംസക്കുട്ടി (40), കാര്യാമ്പലത്തെ നാലരക്കെട്ടില്‍ എന്‍.വി ജാഫര്‍(35) എന്നിവരെ ചേദ്യം ചെയ്തപ്പോഴാണ് സംഘത്തലവനെ കുറിച്ച് സൂചന ലഭിച്ചത്.
മൊബൈല്‍ ഫോണ്‍ വഴിയാണ് സംഘം ഇടപാടു നടത്തുന്നത്. ചുമട്ടുതൊഴിലാളികള്‍, ബസ് ജീവനക്കാര്‍, നിര്‍മാണ തൊഴിലാളികള്‍ തുടങ്ങി നിരവധി സ്ഥിരം ഇടപാടുകാര്‍ ഇവര്‍ക്കുണ്ട്. ഫോണ്‍ ചെയ്യുന്നിടത്തേക്ക് കാറില്‍ എത്തിയാണ് ഇടപാട് നടത്തുക. ഇടപാടുകാരനെന്ന വ്യാജേന ഫോണില്‍ ബന്ധപ്പെട്ടാണ് നാലുപേരെയും പിടികൂടിയത്.
ഡി.വൈ.എസ്.പിയുടെ നേതൃത്വത്തില്‍ ഈ വര്‍ഷം മാത്രം 15ഓളം പേരെ ഇതിനകം ഒറ്റനമ്പര്‍ ലോട്ടറി ചൂതാട്ടവുമായി ബന്ധപ്പെട്ട് പിടികൂടിയിട്ടുണ്ട്.