കൊച്ചി: രാജ്യത്തിനകത്തും പുറത്തുനിന്നും ഒട്ടേറെ പ്രതികൂല സാഹചര്യങ്ങളുണ്ടായിട്ടും രാജ്യത്തെ 204 പ്രത്യേക സാമ്പത്തിക മേഖലകള്‍ 2017 2018 സാമ്പത്തിക വര്‍ഷം 18 ശതമാനം വളര്‍ച്ച രേഖപ്പെടുത്തി. 2016-2017 സാമ്പത്തിക വര്‍ഷം 2,30,797 കോടിയായിരുന്ന ചരക്ക് വ്യാപാര കയറ്റുമതി കഴിഞ്ഞ സാമ്പത്തിക വര്‍ഷത്തില്‍ 2,73,487 കോടിയായി ഉയര്‍ന്നതായി കേന്ദ്ര വാണിജ്യ വകുപ്പിന് കീഴിലുള്ള എക്‌സ്‌പോര്‍ട്ട് പ്രമോഷന്‍ കൗണ്‍സില്‍ ഓഫ് ഇന്ത്യ ഇഒയു അന്റ് എസ്ഇസെഡ് അറിയിച്ചു. പശ്ചിമ ബംഗാളിലെ ഫാള്‍ട്ടയും കൊച്ചി പ്രത്യേക സാമ്പത്തിക മേഖലയുമാണ് ഏറ്റവുമധികം വളര്‍ച്ച രേഖപ്പെടുത്തിയത്. കൊച്ചി പ്രത്യേത സാമ്പത്തിക മേഖല കയറ്റുമതിയില്‍ 111 ശതമാനം വളര്‍ച്ച കൈവരിച്ച് രണ്ടാം സ്ഥാനത്താണ്.
പശ്ചിമ ബംഗാളിലെ ഫാള്‍ട്ട എസ്ഇസെഡാണ് 112 ശതമാനം വളര്‍ച്ചയോടെ ഒന്നാം സ്ഥാനത്ത്. ഉത്പാദനവും സേവനങ്ങളും യാതൊരു തടസ്സവും കൂടാതെ നടക്കുന്ന ഏക സ്ഥലമാണ് പ്രത്യേക സാമ്പത്തിക മേഖലകളെന്ന് ഇപിസിഇഎസ് ചെയര്‍മാന്‍ ഡോ.വിനയ് ശര്‍മ്മ പറഞ്ഞു. പ്രത്യേക സാമ്പത്തിക മേഖലകളില്‍ നിന്നുള്ള സോഫ്റ്റ് വെയര്‍ കയറ്റുമതിയും കഴിഞ്ഞ സാമ്പത്തിക വര്‍ഷത്തെക്കാള്‍ 17 ശതമാനം വര്‍ദ്ധിച്ചു. 2,77,857 കോടിയുടെ സോഫ്റ്റ് വെയറാണ് കഴിഞ്ഞ വര്‍ഷം കയറ്റുമതി ചെയ്യ്തത്.കണ്ട്‌ല സോണ്‍ സോഫ്റ്റ് വെയര്‍ കയറ്റുമതിയില്‍ 75 ശതമാനം വര്‍ദ്ധന രേഖപ്പെടുത്തി. എന്നാല്‍ മൂല്യത്തില്‍ ഇന്‍ഡോറും ഫാള്‍ട്ടയുമാണ് മുന്നില്‍.
വ്യാപാരസാധനങ്ങളും സോഫ്റ്റ് വെയറും ചേര്‍ന്നുള്ള കയറ്റുമതി 5,51,344 കോടിയുടേതാണ്. പാരമ്പര്യേതര ഊര്‍ജ്ജ ഉപകരണങ്ങളുടെ കയറ്റുമതിയില്‍ 113 ശതമാനം വളര്‍ച്ച രേഖപ്പെടുത്തിയപ്പോള്‍ രാജ്യത്തിന് വിദേശ നാണയം ലഭ്യമാക്കാനുള്ള പുതിയ വരുമാനമാര്‍ഗ്ഗമായി ഇത് മാറി. ബയോടെക്കാണ് ഭാവിയില്‍ ഏറ്റവും സാദ്ധ്യത കല്‍പ്പിക്കപ്പെടുന്ന കയറ്റുമതി മേഖല.ത്ത് നിന്നും ഏറ്റുവുമധികം കയറ്റുമതി ചെയ്യുന്നത് യുഎഇയിലേക്കാണ്. അമേരികക്കാണ് രണ്ടാം സ്ഥാനം. എന്നാല്‍, സൗദി അറേബ്യയിലേക്കുള്ള കയറ്റുമതിയില്‍ 80 ശതമാനം വര്‍ദ്ധനവുണ്ടായിട്ടുണ്ട്.
ഇന്ത്യയിലെ പ്രത്യേക സാമ്പത്തികമേഖലകള്‍ക്ക് ചൈന ഒരു ഭീഷണിയാണെങ്കിലും ഇന്ത്യയിലെ എസ്ഇസെഡുകളില്‍ നിന്നും ചൈനയിലേക്കുള്ള കയറ്റുമതിയില്‍ 84 ശതമാനം വര്‍ദ്ധനവുണ്ടായത് നേട്ടമായി വിലയിരുത്തപ്പെടുന്നു.