മഞ്ചേരി: 16ന് നടന്ന ഹര്‍ത്താലില്‍ ഒറ്റപ്പാലം സി.ഐ അബ്ദുല്‍മുനീറിനെ വഴിയില്‍ തടഞ്ഞ് മര്‍ദിച്ച സംഭവത്തില്‍ രണ്ട് പേര്‍ പിടിയിലായി. നറുകര സ്വദേശികളായ പുത്തലത്ത് ജാബിര്‍ (26), ഊരക്കോടന്‍ ഷഹീം(44) എന്നിവരാണ് പിടിയിലായത്. പറപ്പൂരിലെ വീട്ടില്‍നിന്നും മഞ്ചേരി സയന്‍സ് ഇന്‍സ്റ്റിറ്റ്യൂട്ടിലേക്കു വരികയായിരുന്ന സി.ഐയും കുടുംബവും സഞ്ചരിച്ച വാഹനമാണ് മഞ്ചേരി പട്ടര്‍കുളത്ത് തടഞ്ഞിരുന്നത്. തുടര്‍ന്ന് മഞ്ചേരി പൊലിസെത്തിയാണ്സ്ഥിതിഗതികള്‍ ശാന്തമാക്കിയത്.
അതേസമയം പിടിയിലായ ഷഹീമിന്റെ വീട്ടില്‍ ഇന്നലെ അര്‍ധരാത്രിയില്‍ എത്തിയ പൊലിസ് ഭീകരാന്തരീക്ഷം സൃഷ്ടിച്ചെന്നും ഇയാള്‍ നിരപരാധിയാണെന്നും ബന്ധുക്കള്‍ ആരോപിച്ചു.
രാത്രി ഒരു മണിയോടെയാണ് മഞ്ചേരി എസ്.ഐയും സംഘവും ഇയാളെ കസ്റ്റഡിയിലെടുത്തത്. ഓടിച്ചു പിടിക്കുന്നതിനിടയില്‍ ഷഹീം തെന്നിവീണ് കാലിനു ഗുരുതരമായ പരുക്കേറ്റിട്ടുണ്ട്. പരുക്കേറ്റ ഇയാളെ ഇന്നലെ മഞ്ചേരി മെഡിക്കല്‍ കോളജില്‍ പ്രവേശിപ്പിച്ചു. പൊലിസിന്റെ തെറ്റായ നടപടികള്‍ക്കെതിരെ പ്രതിഷേധം ഉയര്‍ന്നിട്ടുണ്ട്.