തിരുന്നാവായ: എടക്കുളത്തിന് നാലുയുവാക്കള്‍ നഷ്ടമായ കോട്ടക്കല്‍ ദുരന്തത്തിന് ഇന്ന് ഒന്നരപതിറ്റാണ്ട് തികയുന്നു. 2003 ഏപ്രില്‍ 28 അതിരാവിലെ ദേശീയപാതയില്‍ കോട്ടക്കല്‍ ചങ്കുവെട്ടിയില്‍ വാഹനാപകടം നടന്നതായുള്ള വാര്‍ത്ത കാട്ടുതീ പോലെ പടര്‍ന്നു. ഒടുവില്‍ സ്ഥിരീകരിക്കപ്പെട്ടപ്പോള്‍ എടക്കുളത്തുകാരാണ് അപടത്തില്‍പ്പെട്ടതെന്ന വിവരം നാടിനെ സ്തംഭിപ്പിച്ചു.
എടക്കുളത്തെ നാലു ചെറുപ്പക്കാരാണ് അപകടത്തില്‍ മരിച്ചത്. എടക്കുളത്ത് പച്ചക്കറി മൊത്തക്കച്ചവടം നടത്തുന്ന യുവാക്കള്‍ അവര്‍ സഞ്ചരിച്ച ചരക്കുവാഹനം ഇടിച്ചുണ്ടായ അപകടത്തിലാണ് മരണപ്പെട്ടത്. എടക്കുളം നീറ്റിങ്ങരയിലെ വെള്ളാടത്ത് മുസ്തഫ, കാതനങ്ങാടിയിലെ ചക്കാലിപ്പറമ്പില്‍ അബ്ദുല്‍ ജലീല്‍, കാതനങ്ങാടിയിലെ ആലുങ്ങല്‍ അബ്ദുല്‍ ലത്തീഫ്, കാതനങ്ങാടിയിലെ ചിറ്റകത്ത് കാര്‍ത്തുവീട്ടില്‍ അവറുട്ടി എന്ന ബാപ്പുട്ടി എന്നിവരാണ് മരണപ്പെട്ടത്. കടയിലേക്ക് പച്ചക്കറി വാങ്ങാന്‍ പുലര്‍ച്ചെ കോട്ടക്കലിലേക്ക് പുറപ്പെട്ടതായിരുന്നു ഈ നാലംഗ കൂട്ടുകാര്‍. എന്നാല്‍, അവര്‍ സഞ്ചരിച്ച പിക്കപ്പ് ജീപ്പില്‍ എതിരേ വന്ന ബസിടിച്ചായിരുന്നു ദാരുണാന്ത്യം. പുലര്‍ച്ചെയായതിനാല്‍ അപകടസ്ഥലത്ത് ആളുകളില്ലാത്തതും തിരിച്ചടിയായി. വിവരം കേട്ടറിഞ്ഞ് കോട്ടക്കലില്‍നിന്നു ഓടിയെത്തിയ പൊലിസും ഓട്ടോ ഡ്രൈവര്‍മാരുമാണ് രക്തത്തില്‍ കുളിച്ചുകിടക്കുന്ന നാലുപേരെയും ആശുപത്രിയില്‍ എത്തിച്ചത്. അപ്പോഴേക്കും സംഭവസ്ഥലത്ത് വച്ചുതന്നെ മൂന്ന് പേര്‍ മരണപ്പെട്ടിരുന്നു. ഒരാള്‍ ആശുപത്രിയിലേക്കുള്ള യാത്രാമധ്യേ മരണത്തിന് കീഴടങ്ങി.