കൊല്ലം: കടവൂര്‍ മതിലില്‍ ഭാഗത്തു കുട്ടികളുമായി സ്‌കൂളിലേയ്ക്ക് പോയ മിനിബസ് നിയന്ത്രണം വിട്ടു മതലിലിടിച്ച് അഞ്ചു കുട്ടികള്‍ക്കു പരുക്കേറ്റു. ഇന്നലെ രാവിലെ 8.30ന് സിവൈഎംഎ ലൈബ്രറിക്ക് മുന്നിലായിരുന്നു അപകടം. വിവിധ സ്‌കൂളുകളിലേയ്ക്കുള്ള കുട്ടികളുമായി പ്രാക്കുളത്ത് നിന്ന് പുറപ്പെട്ട ഡിവൈന്‍ എന്ന മിനിബസാണ് അപകടത്തില്‍പെട്ടത്.
ടെറന്‍സ്(13), സഹോദരി ടെസ(11), രണ്ടാംക്ലാസ് വിദ്യാര്‍ഥി ആല്‍ബിന്‍(8), അദ്വൈത്(13), രുദ്ര(6) എന്നിവര്‍ക്കാണ് പരുക്കേറ്റത്. ബസിനും മതിലിനുമിടയില്‍പെട്ട ഒരു പെട്ടി ഓട്ടോ പൂര്‍ണമായും തകര്‍ന്നു. വാഹനം അമിതവേഗത്തിലായിരുന്നുവെന്ന് കുട്ടികള്‍ പറഞ്ഞു. ഇടിയുടെ ആഘാതത്തില്‍ ബസിന്റെ ഡ്രൈവര്‍ തെറിച്ച് റോഡില്‍ വീണു. പെട്ടിഓട്ടോ ഡ്രൈവര്‍ ഓട്ടോ പാര്‍ക്ക് ചെയ്ത ശേഷം കാപ്പി കുടിക്കാന്‍ പോയ സമയത്തായിരുന്നു അപകടം.