ലഖ്‌നോ: മഥുര കലാപത്തെക്കുറിച്ച് ജുഡിഷ്യല്‍ അന്വേഷണത്തിന് ഉത്തര്‍പ്രദേശ് സര്‍ക്കാര്‍ ഉത്തരവിട്ടു. അലഹബാദ് ഹൈക്കോടതിയില്‍ നിന്നു വിരമിച്ച ജഡ്ജി ഇംതിയാസ് മുര്‍താസയ്ക്കാണ് അന്വേഷണ ചുമതല. രണ്ടുമാസത്തിനുള്ളില്‍ അന്വേഷണ റിപ്പോര്‍ട്ട് സമര്‍പ്പിക്കാനാണ് സര്‍ക്കാര്‍ നിര്‍ദേശിച്ചിരിക്കുന്നത്.
അതിനിടെ കലാപത്തില്‍ സി.ബി.ഐ അന്വേഷണം വേണമെന്ന ഹരജി സുപ്രിംകോടതി ഇന്നലെ തള്ളി. സംഘര്‍ഷത്തിന് ശേഷം സംസ്ഥാന സര്‍ക്കാര്‍ നിഷ്‌ക്രിയമായിരുന്നെന്ന് സ്ഥാപിക്കാന്‍ ഹരജിക്കാരന് കഴിഞ്ഞില്ലെന്ന് ചൂണ്ടിക്കാണിച്ചാണ് കോടതി ഹരജി തള്ളിയത്.
വെടിവയ്പിലേക്കും 29 പേര്‍ കൊല്ലപ്പെടുന്നതിലേക്കും നയിച്ച സംഭവങ്ങളെക്കുറിച്ച് ജുഡീഷ്യല്‍ കമ്മിഷന്‍ അന്വേഷിക്കും. ഇത്തരം സംഭവങ്ങള്‍ ഇനി ആവര്‍ത്തിക്കാതിരിക്കാനുള്ള നിര്‍ദേശങ്ങളും കമ്മിഷന്‍ മുന്നോട്ടുവയ്ക്കും. പൊലിസ് സൂപ്രണ്ടും ഒരു പൊലിസുകാരനും ഉള്‍പ്പെടെ 24 പേരാണ് കഴിഞ്ഞ ആഴ്ച ഉത്തര്‍പ്രദേശിലെ മഥുരയില്‍ കൊല്ലപ്പെട്ടത്.