ചേര്‍ത്തല: മൈക്രോഫിനാന്‍സ് പദ്ധതി സുതാര്യമാക്കാനും സാമ്പത്തിക ഇടപാടുകളെ പറ്റിയുള്ള സമഗ്ര റിപ്പോര്‍ട്ട് തയ്യാറാക്കി സമര്‍പ്പിക്കാനും എസ്.എന്‍.ഡി.പി യോഗം ഡയറക്ടര്‍ ബോര്‍ഡ് യോഗത്തില്‍ തീരുമാനിച്ചു. ചേര്‍ത്തലയില്‍ കൂടിയ യോഗത്തില്‍ യോഗം ജനറല്‍ സെക്രട്ടറി വെളളാപ്പള്ളി നടേശനാണ് ഇതുസംബന്ധിച്ച് റിപ്പോര്‍ട്ട് അവതരിപ്പിച്ചത്.
സാമ്പത്തിക ഇടപാടുകളില്‍ യൂണിയനുകളുടെ എല്ലാ ഭാരവാഹികളുടെയും ശ്രദ്ധവേണമെന്നും ഒന്നോ രണ്ടോ പേര്‍ മാത്രം സാമ്പത്തിക കാര്യങ്ങള്‍ കൈകാര്യം ചെയ്യുമ്പോഴാണ് പ്രശ്‌നങ്ങള്‍ ഉണ്ടാകുന്നതെന്ന് എസ്.എന്‍.ഡി.പി യോഗം വൈസ് പ്രസിഡന്റ് തുഷാര്‍ വെള്ളാപ്പള്ളി പറഞ്ഞു.
ഇനി എവിടെയെങ്കിലും പ്രശ്‌നങ്ങളുണ്ടെങ്കില്‍ റിപ്പോര്‍ട്ട് ചെയ്യാനും നിര്‍ദ്ദേശം നല്‍കിയിട്ടുണ്ട്. എസ് എന്‍ ഡി പി ശാഖകളുടെ പ്രവര്‍ത്തനം ഊര്‍ജിതപ്പെടുത്താന്‍ 17 മുതല്‍ 19 വരെ കന്യാകുമാരിയില്‍ നേതൃയോഗം വിളിച്ചിട്ടുണ്ട്. കൂടുതല്‍ സാമൂഹ്യ ക്ഷേമ പ്രവര്‍ത്തനങ്ങളും നടത്താനും ശാഖകളും കുടുംബ യൂണിറ്റുകളും പഠനോപകരണ വിതരണം,സ്‌കോളര്‍ഷിപ്പ് വിതരണം, മഴക്കാല ദുരിതാശ്വാസം, ശുചീകരണം,പകര്‍ച്ച വ്യാധി രോഗ പ്രതിരോധം,പരിസ്ഥിതി സംരക്ഷണം തുടങ്ങിയ പ്രവര്‍ത്തനങ്ങള്‍ ഏറ്റെടുക്കാനും നിര്‍ദ്ദേശം നല്‍കിയിട്ടുണ്ടെന്ന് തുഷാര്‍ വെള്ളാപ്പള്ളി പറഞ്ഞു.