വൈക്കം: ആഗ്രോ ഇന്‍ഡസ്ട്രീസ് കോര്‍പറേഷന്റെ വൈക്കം യൂണിറ്റ് നാഥനില്ലാ കളരിയായി മാറിയെന്ന് ആക്ഷേപം. കര്‍ഷകരുടെ സഹായത്തിനായി രൂപം കൊടുത്ത ഈ സ്ഥാപനത്തില്‍ നിന്നും ശരിയായ സേവനം ലഭിക്കുന്നില്ലെന്ന് കര്‍ഷകരും സംഘടനകളും ആരോപിച്ചു.
13 ജീവനക്കാരുള്ള ഈ സ്ഥാപനത്തില്‍ രണ്ട് പേരൊഴികെ എല്ലാവരും താല്‍ക്കാലിക ജീവനക്കാരാണ്. സ്ഥാപനത്തിന്റെ ചുമതലയുള്ള ഓഫിസര്‍ മാസത്തില്‍ ഒരിക്കല്‍ മാത്രമേ ഇവിടെ വരാറുള്ളു. അതുകൊണ്ടുതന്നെ കുത്തഴിഞ്ഞ രീതിയിലാണ് സ്ഥാപനത്തിന്റെ പ്രവര്‍ത്തനവും. ഈ ഓഫിസില്‍ നടക്കുന്ന ക്രമക്കേടുകള്‍ നാട്ടില്‍ പാട്ടാണെന്നും ഇവര്‍ ആരോപിക്കുന്നു.
സ്ഥാപനത്തിലുള്ള മുപ്പതോളം കൊയ്ത്തുമെതിയന്ത്രം കേടായിട്ട് നാളുകളായി. യഥാസമയം നന്നാക്കി കര്‍ഷകര്‍ക്ക് നല്‍കുന്നതിനുള്ള നടപടിയില്ല. ഇത്രയധികം കൊയ്ത്തുമെതി യന്ത്രങ്ങള്‍ വൈക്കത്തുള്ളപ്പോള്‍ ജില്ലാപഞ്ചായത്തില്‍ നിന്നും തമിഴ്‌നാട്ടില്‍ നിന്നും കൊണ്ടുവരേണ്ട ഗതികേടിലാണ് കര്‍ഷകര്‍. കോടികള്‍ വിലമതിക്കുന്ന കൊയ്ത്തുമെതി യന്ത്രങ്ങള്‍ കേടായി തുരുമ്പെടുക്കുമ്പോഴും അധികൃതര്‍ കണ്ടഭാവം നടിക്കുന്നില്ല.
സൗകര്യപ്രദമായ വര്‍ക്ക്‌ഷോപ്പും ആറോളം മെക്കാനിക്കല്‍ സ്റ്റാഫും ഉണ്ടായിട്ടും ഇത്രയധികം യന്ത്രങ്ങള്‍ റിപ്പയറിങ് നടത്താതെ മഴയും വെയിലുമേറ്റ് നശിച്ചുകൊണ്ടിരിക്കുന്നത് ഈ സ്ഥാപനത്തിലെ കെടുകാര്യസ്ഥതയ്ക്ക് ഉദാഹരണമാണെന്ന് വൈക്കം ജനജാഗ്രതാ സമിതി ആരോപിച്ചു. സ്ഥിരം ജീവനക്കാര്‍ അപൂര്‍വമായി മാത്രമേ ഈ സ്ഥാപനത്തില്‍ കാണാറുള്ളു. താല്‍ക്കാലിക ജീവനക്കാരായ രണ്ടുവനിതകള്‍ മാത്രമാണ് സാധാരണയായി ഈ ഓഫിസില്‍ കാണാറുള്ളത്. താല്‍ക്കാലികക്കാരായതിനാല്‍ അവര്‍ക്ക് ആധികാരികമായി മറുപടിപറയാനോ സേവനം നല്‍കുവാനോ കഴിയാറില്ല.
ഇവിടുത്തെ ക്രമക്കേടുകളെ കുറിച്ച് താലൂക്ക് വികസന സമിതിയില്‍ ലഭിച്ച പരാതി ഗൗരവമേറിയ ചര്‍ച്ചകള്‍ക്ക് വഴിവച്ചെങ്കിലും സ്ഥാപനത്തിലെ ഉത്തരവാദപ്പെട്ട ഉദ്യോഗസ്ഥന്‍ ഇതുവരെ സഭയില്‍ ഹാജരായിട്ടില്ല. ഒരു സര്‍ക്കാരാഫീസിന്റെ നിലവാരത്തിലല്ല ഈ സ്ഥാപനം പ്രവര്‍ത്തിക്കുന്നതെന്നാണ് താലൂക്ക് വികസന സമിതി യോഗം വിലയിരുത്തിയത്. ഈ സ്ഥാപനത്തിലെ ക്രമക്കേടുകളെക്കുറിച്ച് ശരിയായ ഒരു ഓഡിറ്റോ വിജിലന്‍സ് അന്വേഷണമോ നടന്നാല്‍ ഞെട്ടിക്കുന്ന പല വിവരങ്ങളും പുറത്തുവരുമെന്ന് പറയപ്പെടുന്നു. ഗവണ്‍മെന്റിനും കൃഷിവകുപ്പിനും ദുഷ്‌പേരുണ്ടാക്കുന്ന വിധത്തില്‍ പ്രവര്‍ത്തിക്കുന്നവര്‍ക്കെതിരേ കര്‍ശന നടപടി കൈകൊള്ളണമെന്നും ജനജാഗ്രതസമിതി ആവശ്യപ്പെട്ടു.