പമ്പ: യുവതികള്‍ ദര്‍ശനം നടത്തിയെന്ന് സ്ഥിരീകരിച്ചതിന് പിന്നാലെ ശബരിമല നട അടച്ചു. 10.30നാണ് നടയടച്ചത്. ശുദ്ധിക്രിയയ്ക്ക് ശേഷം നടതുറന്നു.ബിംബശുദ്ധി ഉൾപ്പെടെയുള്ള ശുദ്ധിക്രിയകൾക്കുശേഷമാണ് നട തുറന്നത്. 

അയ്യപ്പന്മാരെ പതിനെട്ടാം പടിക്കു താഴേക്കു മാറ്റിയാണ് ശുദ്ധിക്രിയകൾ നടത്തിയത്. 

ഇന്ന് പുലര്‍ച്ചെ മൂന്നുമണിയോടെയാണ് ബിന്ദുവും കനക ദുര്‍ഗ്ഗയും സന്നിധാനത്തെത്തിയത് 3:45ന് പൊലിസിന്റെ സംരക്ഷണയില്‍ ദര്‍ശനം നടത്തിയെന്ന് ഇരുവരും  മാധ്യമങ്ങളോട് പറഞ്ഞു.

ഇവര്‍ സന്ദര്‍ശനം നടത്തുന്നതിന്റെ ദൃശ്യങ്ങളും പുറത്തായിട്ടുണ്ട്. അവര്‍ തന്നെ പുറത്തുവിട്ടതാണ് ദൃശ്യങ്ങളെന്നാണ് റിപ്പോര്‍ട്ട്. മഹാകാണിക്കക്ക് സമീപമുള്ള വി.ഐ.പി ഗേറ്റ് വഴി അകത്തു കടക്കുന്നതാണ് ദൃശ്യങ്ങള്‍. ദര്‍ശനം നടത്തുന്നതും ദൃശ്യത്തിലുണ്ട്.

ഭക്തജനങ്ങള്‍ക്കുള്ള സാധാരണ വരിയില്‍ അല്ലാതെ വി.ഐ.പി ഗേറ്റ് വഴി നടയിലെത്തി തൊഴുതു മടങ്ങിയതായി ബിന്ദു പറഞ്ഞു. പൊലിസ് സുരക്ഷയില്‍ മൂന്നരയോടെയാണ് സന്നിധാനത്തെത്തിയത്. പുലര്‍ച്ചെ ഒരു മണിയോടെയാണ് പമ്പയിലെത്തിയത്. പമ്പയില്‍ എത്തിയ ശേഷമാണ് സുരക്ഷ തേടിയതെന്നും ബിന്ദു വ്യക്തമാക്കി. സ്ത്രീ വേഷത്തില്‍ത്തന്നെയാണ് ദര്‍ശനം നടത്തിയത്. പമ്പയില്‍ നിന്നും സന്നിധാനം വരെയുള്ള പാതയില്‍ ഏതാനും ഭക്തര്‍ തങ്ങളെ തിരിച്ചറിഞ്ഞിരുന്നു. എന്നാല്‍ ഒരുവിധത്തിലുള്ള പ്രതിഷേധവും ഉണ്ടായില്ല. ഭക്തര്‍ മാത്രമാണ് സന്നിധാനത്ത് ഉണ്ടായിരുന്നത്. പൊലിസ് പിന്തിരിപ്പാക്കാന്‍ ശ്രമിച്ചില്ല. മഫ്തിയില്‍ സുരക്ഷ നല്‍കിയെന്നും സുരക്ഷിതമായി തിരിച്ചിറങ്ങിയെന്നും ബിന്ദു പ്രതികരിച്ചു.

യുവതികള്‍ ദര്‍ശനം നടത്തിയെന്ന് പൊലിസ് സ്ഥിരീകരിച്ചു. ബിന്ദുവും കനകദുര്‍ഗയും ആറു പുരുഷന്‍മാരും ഉള്‍പ്പെടെ എട്ടംഗ സംഘമാണ് എത്തിയതെന്നും പൊലിസ് അറിയിച്ചു. ശബരിമല ദര്‍ശനത്തിന് സുരക്ഷ നല്‍കണമെന്നാവശ്യപ്പെട്ട് കഴിഞ്ഞ ദിവസം ഇവര്‍ പൊലിസിനെ സമീപിച്ചിരുന്നു. എന്നാല്‍ പരിമിതമായ സുരക്ഷ നല്‍കാമെന്നാണ് പൊലിസ് അറിയിച്ചിരുന്നത്.

[video width="352" height="640" mp4="http://suprabhaatham.com/wp-content/uploads/2019/01/42642353_1296823087124810_2328625643434567896_n.mp4"][/video]

അതേസമയം, സി.സി ടിവി ദൃശ്യങ്ങള്‍ പരിശോധിച്ച് ഇക്കാര്യം സ്ഥിരീകരിക്കുമെന്ന് ദേവസ്വം ബോര്‍ഡ് പ്രസിഡന്റ് എ.പത്മകുമാര്‍ അറിയിച്ചു.

ഡിസബംര്‍ 24ന് ശബരിമല ദര്‍ശനത്തിന് എത്തിയ ബിന്ദുവിനെയും കനക ദുര്‍ഗയെയും പ്രതിഷേധങ്ങളെ തുടര്‍ന്ന് പൊലിസ് തിരിച്ചിറക്കിയിരുന്നു. എന്നാല്‍ വീണ്ടും മലകയറണമെന്ന ആവശ്യത്തില്‍ അവര്‍ ഉറച്ചു നില്‍ക്കുകയായിരുന്നു. പൊലിസ് സുരക്ഷ നല്‍കിയില്ലെങ്കില്‍ സ്വന്തം നിലയില്‍ സന്നിധാനത്തെത്തുമെന്നായിരുന്നു അവരുടെ നിലപാട്.