മലപ്പുറം: പച്ചക്കറി ഉത്പാദനത്തില്‍ ജില്ല സ്വയം പര്യപ്തതയിലേക്ക്. കഴിഞ്ഞ വര്‍ഷത്തെ കണക്കുപ്രകാരം ജില്ല വന്‍ മുന്നേറ്റമാണ് നടത്തിയിട്ടുള്ളത്. ഒരു ഹെക്ടറില്‍ നിന്ന് 13 ടണ്‍ ഉത്പാദിപ്പിക്കാനായിരുന്നു കൃഷി വകുപ്പ് ലക്ഷ്യം വച്ചിരുന്നതെങ്കില്‍ കഴിഞ്ഞ വര്‍ഷം ഉത്പാദിപ്പിച്ചത് 15 ടണ്‍ പച്ചക്കറിയാണ്. ജില്ലക്കാവശ്യമുള്ള പച്ചക്കറിയുടെ 70 ശതമാനവും ഇപ്പോള്‍ ജില്ലയില്‍ ഉത്്പ്പാദിപ്പിക്കുന്നുണ്ട്. ഇതുതന്നെ എഴുപത് ശതമാനവും ജൈവ പച്ചക്കറിയുമാണ്. 2013-14ല്‍ ജില്ലയിലെ പച്ചക്കറി ഉത്പാദനം 22,000 ടണ്‍ ആയിരുന്നു. ഒരു വര്‍ഷംകൊണ്ട് അതു വര്‍ധിച്ച് 36,875 ടണ്ണായി. എന്നാല്‍ കഴിഞ്ഞ വര്‍ഷത്തെ ഉത്പാദനമാകട്ടെ 53,317 ടണ്‍ ആണ്. 2013-14ല്‍ ആകെ കൃഷി ചെയ്തത് 2000 ഹെക്ടറിലായിരുന്നു. 2014-15ല്‍ ഇത് 3951 ഹെക്ടറായി ഉയര്‍ന്നു.

പച്ചക്കറി ക്ലസ്റ്ററുകളുടെ മികച്ച പ്രവര്‍ത്തനവും സ്‌കൂളുകളിലെ പച്ചക്കറിത്തോട്ടവും വന്‍ വിജയമായതാണ് പദ്ധതിയെ യാഥാര്‍ഥ്യത്തിലേക്ക് അടുപ്പിച്ചത്. മികച്ച രീതിയില്‍ കൃഷിയിറക്കുന്ന 60 ക്ലസ്റ്ററുകളാണ് ജില്ലയിലുള്ളത്. ഉല്‍പ്പാദിപ്പിക്കുന്ന പച്ചക്കറി വില്‍പ്പന നടത്തുന്നതിനായി ക്ലസ്റ്ററുകള്‍ക്ക്് കീഴില്‍ ഇക്കോ ഷോപ്പുകളും പ്രവര്‍ത്തിക്കുന്നത് കര്‍ഷകര്‍ക്ക് ഏറെ അുഗ്രഹമാണ്. ഈ രീതിയില്‍ ഉദ്പാദനം തുടര്‍ന്നാല്‍ പച്ചക്കറിയില്‍ ജില്ല സ്വയം പര്യാപ്തമാകാന്‍ അധികം സമയം വേണ്ടിവരില്ലെന്ന് ജില്ലാ കൃഷി ഡെപ്യൂട്ടി ഡയറക്ടര്‍ എം.പി വല്‍സമ്മ പറഞ്ഞു. അടുത്ത വര്‍ഷം മുതല്‍ കൂടുല്‍ ഇക്കോ ഷോപ്പുകള്‍ ആരംഭിക്കാനും അതുവഴി പച്ചക്കറി ഉത്പ്പാദനം ഉയര്‍ത്താനുമാണ് പദ്ധതി. അതിനുപുറമെ ജൈവ പച്ചക്കറി ഉദ്പാദനം നൂറു ശതമാനമാക്കാനുള്ള പദ്ധതിയും തയാറാക്കിയിട്ടുണ്ട്. കഴിഞ്ഞ വര്‍ഷം 440 സ്‌കൂളുകളിലാണ് പച്ചക്കറിത്തോട്ടം പദ്ധതി നടപ്പാക്കിയത്. 15 സ്‌കൂളുകളില്‍ ഹൈടെക് പച്ചക്കറി കൃഷി പദ്ധതിയും നടപ്പാക്കി. ഇതുവഴി എല്ലാ സ്‌കൂളുകളും ഒരു ലക്ഷം രൂപ വീതമാണ് ലാഭമുണ്ടാക്കിയത്. കഴിഞ്ഞ വര്‍ഷം 1.3 കോടിരൂപയുടെ 13 ലക്ഷം വിത്തുകളാണ് സ്‌കൂളുകള്‍ക്കും സന്നദ്ധസംഘടനകള്‍ക്കും വീടുകള്‍ക്കുമായി വിതരണം ചെയ്തത്. ഈ വര്‍ഷം പദ്ധതി കടുതല്‍ സ്‌കൂളുകളിലേക്ക് വ്യാപിപ്പിക്കാനുള്ള തയാറെടുപ്പിലാണ് അധികൃതര്‍.