തിരുവനന്തപുരം: ഹര്‍ത്താല്‍ ആഹ്വാനത്തെ തുടര്‍ന്ന് വ്യാഴാഴ്ച നടത്താനിരുന്ന വിവിധ പരീക്ഷകളും അഭിമുഖങ്ങളും മാറ്റി. ഒന്നും രണ്ടും വര്‍ഷ ഹയര്‍സെക്കന്ററി വൊക്കേഷണല്‍ ഹയര്‍സെക്കന്ററി അര്‍ധവാര്‍ഷിക പരീക്ഷ നാലാം തിയ്യതിയിലേക്കു മാറ്റി. പരീക്ഷാസമയത്തില്‍ മാറ്റമില്ല.

സാങ്കേതിക സര്‍വ്വകലാശാലയും ആരോഗ്യ സര്‍വ്വകലാശാലയും കേരള സര്‍വ്വകലാശാലയും വ്യാഴാഴ്ച നടത്താനിരുന്ന എല്ലാ പരീക്ഷകളും മാറ്റി. പുതുക്കിയ തിയതി പിന്നീട് അറിയിക്കും.

കേരള മീഡിയ അക്കാദമി വ്യാഴാഴ്ച അക്കാദമി ആസ്ഥാനത്ത് നടത്താനിരുന്ന ഫോട്ടോ ജേര്‍ണലിസം കോഴ്‌സിന്റെ അഭിമുഖം മാറ്റിവെച്ചു. പകരം ഈ മാസം ഏഴിന് നടത്തും. വ്യാഴാഴ്ച തിരുവനന്തപുരത്ത് നടത്തുന്ന അഭിമുഖത്തിന് മാറ്റമില്ല.