മൂഡബിദ്രി: കൈനിറയെ പണവും മികച്ച പരിശീലന സൗകര്യവും ഒരുക്കിനല്‍കി ആല്‍വാസ് എജ്യുക്കേഷന്‍ ഫൗണ്ടേഷന്‍ ട്രാക്കിലിറക്കിയ താരങ്ങളുടെ കരുത്തില്‍ ഒരിക്കല്‍കൂടി മംഗളൂരു സര്‍വകലാശാല കിരീടം നേടി. സംഘാടനത്തില്‍ ഒരു പടി മുന്നില്‍നിന്നാണ് അഖിലേന്ത്യാ അന്തര്‍ സര്‍വകലാശാല അത്‌ലറ്റിക് ചാംപ്യന്‍ഷിപ്പിന് തിരശ്ശീല വീണത്. അത്‌ലറ്റിക് ചാംപ്യന്‍ഷിപ്പ് സംഘടിപ്പിക്കുന്നവര്‍ക്ക് മാതൃകയാക്കാവുന്നത് തന്നെയാണ് ആതിഥേയരായ ആല്‍വാസിന്റെ സംഘാടന മികവ് എന്നതില്‍ സംശമില്ല. പതിവു പോലെ ട്രാക്കിലും ഫീല്‍ഡിലും താരോദയത്തിന് മൂഡബിദ്രിയിലെ സ്വരാജ് മൈതാനം സാക്ഷ്യം വഹിച്ചു. സംസ്ഥാന, ദേശീയ സ്‌കൂള്‍, ഫെഡറേഷന്‍ അത്‌ലറ്റിക് ചാംപ്യന്‍ഷിപ്പുകളില്‍ മിന്നുന്ന പ്രകടനം കാഴ്ചവച്ച ഹര്‍ഡില്‍സ് താരം അപര്‍ണ റോയ്, ട്രിപ്പിള്‍ ജംപര്‍ സാന്ദ്ര ബാബു എന്നിവര്‍ ആദ്യ സര്‍വകലാശാല ചാംപ്യന്‍ഷിപ്പില്‍ തന്നെ കരിയര്‍ ബെസ്റ്റ് പ്രകടനം പുറത്തെടുത്തു.