മുക്കം: ഹര്‍ത്താല്‍ സമയത്തിനും മുന്‍പേ റോഡ് തടസപ്പെടുത്തി റോഡിനു കുറുകെയിട്ട കല്ലുകളില്‍ തട്ടി ബൈക്ക് മറിഞ്ഞ് മദ്‌റസാധ്യാപകനു ഗുരുതര പരുക്ക്. താഴെ തിരുവമ്പാടി നൂറുല്‍ ഇസ്‌ലാം മദ്‌റസാധ്യാപകന്‍ അബൂബക്കര്‍ മുസ്‌ലിയാര്‍ക്ക് (60) ആണ് ഗുരുതരമായി പരുക്കേറ്റത്. ഓമശ്ശേരി- തിരുവമ്പാടി പാതയിലെ കല്ലുരുട്ടിയിലാണു സംഭവം.
പിറകെ വന്ന വാഹന യാത്രക്കാരാണ് അബോധാവസ്ഥയില്‍ റോഡില്‍ കിടക്കുന്ന ഇദ്ദേഹത്തെ കണ്ടെത്തിയത്. ഉടന്‍തന്നെ ഇയാളെ നാട്ടുകാരുടെ സഹായത്തോടെ ഓമശ്ശേരിയിലെ സ്വകാര്യ ആശുപത്രിയില്‍ പ്രവേശിപ്പിക്കുകയായിരുന്നു. തലയ്ക്കും നാവിനും പരുക്കേറ്റ ഇദ്ദേഹത്തെ അടിയന്തര ശസ്ത്രക്രിയയ്ക്ക് വിധേയമാക്കി. രാവിലെ ആറിന് തുടങ്ങുമെന്ന് പ്രഖ്യാപിച്ച ഹര്‍ത്താലിലാണ് ജനങ്ങളെ ബുദ്ധിമുട്ടിക്കുന്ന തരത്തില്‍ അതിരാവിലെ തന്നെ റോഡുകള്‍ തടസപ്പെടുത്തിയത്.