റിയാദ്: കാറ് കഴുകാന്‍ വൈകിയതിന്റെ പേരില്‍ സ്‌പോണ്‍സറുടെ മകന്‍ ക്രൂരമായി മര്‍ദിച്ചതായി പരാതി. മലപ്പുറം, വാളാഞ്ചേരി, പൈങ്ങന്നുര്‍, കുഞ്ഞനം കാട്ടില്‍ അഷറഫിനാണ് (43) മര്‍ദനമേറ്റത്. പരാതിയെ തുടര്‍ന്ന് മെഡിക്കല്‍ റിപ്പോര്‍ട്ടിന്റെ അടിസ്ഥാനത്തില്‍ പൊലീസ് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചു. നാലര വര്‍ഷമായി കിഴക്കന്‍ സഊദിയിലെ ദമാമില്‍ സഊദിയുടെ വീട്ടില്‍ ഡ്രൈവറായി ജോലി ചെയ്തു വരുന്ന ഇദ്ദേഹത്തിന് സ്‌പോണ്‍സറെ കുറിച്ച് നല്ല അഭിപ്രായമാണ്. ഇതിന് പുറമേ, സ്‌പോണ്‍സറുടെ ഹാര്‍ഡ് വെയര്‍ കടയിലും, വീട്ടിലെ പ്ലംബിംഗ്, ഇലക്ട്രിക് ജോലികളും ഇദ്ദേഹത്തിന് ചെയ്യേണ്ടി വരുന്നുണ്ട്.
ഇതു കഴിഞ്ഞ് സ്‌പോണ്‍സറുടെ മകന്‍ പറഞ്ഞ ജോലി ചെയ്യാന്‍ വൈകിയതാണ് മര്‍ദനകാരണമത്രെ. ഇരുമ്പു കമ്പികൊണ്ട് അടിക്കുകയായിരുന്നുവെന്ന് അഷ്‌റഫ് പറയുന്നു. അടുത്തുണ്ടായിരുന്ന ചിലര്‍ തടയാന്‍ എത്തിയ തക്കത്തില്‍ ഓടി രക്ഷപെട്ട് സെന്‍ട്രല്‍ ആശുപത്രിയിലെത്തി. ജീവകാരുണ്യ പ്രവര്‍ത്തകനായ ഷാജി വയനാടിന്റെ സഹായത്താല്‍ ഇന്ത്യന്‍ എംബസിയിലും തുടര്‍ന്ന് പൊലിസിലും പരാതി നല്‍കിയിട്ടുണ്ട്.