ബോവിക്കാനം: ഒളിയത്തടുക്കയില്‍ വീണ്ടും കാട്ടാനയിറങ്ങി. കഴിഞ്ഞ ദിവസം രാത്രിയോടെ ഒളിയത്തടുക്ക വട്ടംതട്ടയില്‍ ഇറങ്ങിയ ആനക്കൂട്ടം വ്യാപകമായി കാര്‍ഷിക വിളകള്‍ നശിപ്പിച്ചു. വട്ടംതിട്ടയിലെ കെ. കൃഷ്ണന്‍ നായര്‍, കെ. മാധവന്‍ നായര്‍ എന്നിവരുടെ ഇരുപത്തിയഞ്ചോളം കമുകുകളും നൂറോളം വാഴകളും ജലസേചനം നടത്താന്‍ ഉപയോഗിക്കുന്ന പൈപ്പും നശിപ്പിച്ചു.
20 ദിവസം മുന്‍പും ഈ പ്രദേശങ്ങളില്‍ കാട്ടാന ഇറങ്ങിയിരുന്നു. രാത്രികാലങ്ങളില്‍ വീണ്ടും കാട്ടാനക്കൂട്ടം ജനവാസ കേന്ദ്രങ്ങളിലിറങ്ങുമെന്ന ഭീതിയിലാണ് നാട്ടുകാര്‍.
ആനക്കൂട്ടം കൃഷിയിടങ്ങളിലിറങ്ങുമെന്ന സംശയത്തെ തുടര്‍ന്ന് രാത്രി ഏറെ വൈകിയും നാട്ടുകാര്‍ തീ കൂട്ടി കാവലിരിക്കുകയായിരുന്നു. മാസങ്ങള്‍ക്കു മുന്‍പ് കാനത്തൂര്‍, എരിഞ്ഞിപുഴ, ഒളിയത്തടുക്ക ഭാഗങ്ങളില്‍ ഇറങ്ങിയ കാട്ടാനകള്‍ ലക്ഷക്കണക്കിനു രൂപയുടെ കാര്‍ഷിക വിളകളാണ് നശിപ്പിച്ചത്.