ന്യൂഡല്‍ഹി: സംസ്ഥാന സര്‍ക്കാരിനും മുഖ്യമന്ത്രി പിണറായി വിജയനുമെതിരെ കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍. പാര്‍ലമെന്റ് പാസാക്കിയ നിയമത്തിനെതിരെ നിയമസഭ പ്രമേയം പാസാക്കിയത് കൊണ്ട് നിയമം ഇല്ലാതാക്കാനാകില്ലെന്ന് അദ്ദേഹം പറഞ്ഞു.

നിയമം ഭരണഘടനാ വിരുദ്ധമാണോയെന്ന് പരിശോധിക്കേണ്ടത് കോടതിയാണ്. അല്ലെങ്കില്‍ പാര്‍ലമെന്റ് തന്നെ തയ്യാറാകണമെന്നും മുല്ലപ്പള്ളി പറഞ്ഞു.

പാര്‍ലമെന്റ് പാസാക്കിയ പൗരത്വ നിയമത്തിനെതിരെ മുഖ്യമന്ത്രി പരസ്യം നല്‍കിയത് ശരിയായില്ലെന്നും അദ്ദേഹം പറഞ്ഞു. ഇതിനായി കോടികളാണ് സര്‍ക്കാര്‍ ചെലവഴിച്ചത്. രാഷ്ട്രീയ നേട്ടം കൊയ്യലായിരുന്നു പിണറായിയുടെ ലക്ഷ്യമെട്ടും മുല്ലപ്പള്ളി വാര്‍ത്താ സമ്മേളനത്തില്‍ ആരോപിച്ചു.

മുഖ്യമന്ത്രിയുടെ ന്യൂനപക്ഷ പ്രേമം കാപട്യമാണെന്ന് മുല്ലപ്പള്ളി ആരോപിച്ചു. കേരളത്തിലെ മുസ്‌ലിംകളുടെ കണ്ണില്‍ പൊടിയിടാനാണ് പൗരത്വ നിയമത്തിനെതിരെ നിലപാട് സ്വീകരിച്ച് മുഖ്യമന്ത്രി രംഗത്ത് വന്നത്. പൗരത്വ നിയമത്തിനെതിരെ മുഖ്യമന്ത്രിമാര്‍ക്ക് കത്തെഴുതിയപ്പോള്‍ അവര്‍ സമരമുഖത്തായിരുന്നു. അപ്പോളും പിണറായി കത്തെഴുക മാത്രമാണ് ചെയ്തത്. പൗരത്വ നിയമത്തിനെതിരെ മതേതര ജനാധിപത്യ ശക്തികള്‍ ഒരുമിക്കുന്നതില്‍ തെറ്റില്ല. പക്ഷേ സി.പി.എമ്മുമായി യോജിച്ച് കേരളത്തില്‍ സമരം ചെയ്യാന്‍ കോണ്‍ഗ്രസില്ലെന്നും ഇക്കാര്യത്തില്‍ തന്റെ നിലപാടില്‍ മാറ്റമില്ലെന്നും മുല്ലപ്പള്ളി പറഞ്ഞു.

സി.പി.എം നേതാക്കള്‍ ആക്രമിച്ചത് കൊണ്ട് തന്റെ നിലപാടില്‍ വെള്ളം ചേര്‍ക്കില്ല. താന്‍ മുഖ്യമന്ത്രി പിണറായി വിജയനെപ്പോലെ ഭീരുവല്ല. സി.പി.എം തനിക്കെതിരെ നടത്തുന്ന ആക്രമണത്തെ നേരിടാന്‍ താന്‍ തന്നെ മതിയെന്നും മുല്ലപ്പള്ളി പറഞ്ഞു.