കൊല്‍ക്കത്ത: വിമാനം ബോംബിട്ടു തകര്‍ക്കുമെന്ന യാത്രക്കാരിയുടെ ഭീഷണിയില്‍ വിമാനം അടിയന്തരമായി തിരിച്ചിറക്കി.  കൊല്‍ക്കത്തയില്‍ നിന്ന് മുംബൈയിലേക്ക് പോവുകയായിരുന്ന എയര്‍ഏഷ്യ 15316 വിമാനമാണ് പാതിവഴിയില്‍ യാത്ര അവസാനിപ്പിച്ച് തിരിച്ചിറക്കിയത്.

തന്റെ ദേഹത്ത് ബോംബുണ്ടെന്നും ഉടന്‍ പൊട്ടിത്തെറിക്കുമെന്നും യാത്രക്കാരി ജീവനക്കാര്‍ക്ക് എഴുതി നല്‍കുകയായിരുന്നു. ഇതോടെ പൈലറ്റ് എയര്‍ ട്രാഫിക് കണ്‍ട്രോളറെ വിവരമറിയിക്കുകയും വിമാനം തിരിച്ചുവിടുകയും ചെയ്തു. 11 മണിയോടെ കൊല്‍ക്കത്ത വിമാനത്താവളത്തില്‍ അടിയന്തര സാഹചര്യം പ്രഖ്യാപിച്ചു. 11.46ഓടെ ലാന്‍ഡ് ചെയ്ത വിമാനത്തെ ഐസൊലേഷന്‍ ഏരിയയിലേക്ക് മാറ്റി. യുവതിയെ ഉടന്‍തന്നെ സെന്‍ട്രല്‍ ഇന്‍ഡസ്ട്രി സെക്യൂരിറ്റി ഫോഴ്സ് കസ്റ്റഡിയിലെടുത്തു.