കാസര്‍കോട്: ബി.ജെ.പിയും സംഘ്പരിവാര്‍ സംഘടനകളും ജില്ലയിലാകെ അക്രമികളെ കയറൂരി വിട്ടിരിക്കുകയാണെന്നും ഇതിനെതിരേ ജനങ്ങളെ അണിനിരത്തി പ്രതിരോധിക്കുമെന്നും സി.പി.എം നേതാക്കള്‍ വാര്‍ത്താസമ്മേളനത്തില്‍ വ്യക്തമാക്കി. കലാപത്തിനു നേതൃത്വം നല്‍കിയ ബി.ജെ.പി നേതാക്കള്‍ക്കെതിരേ കേസെടുക്കണം. സംഘ്പരിവാര്‍ അക്രമത്തില്‍ വീടുകളും വാഹനങ്ങളും പാര്‍ട്ടി ഓഫിസുകളും തകര്‍ക്കപ്പെട്ടിട്ടുണ്ട്. ഇവയുടെയെല്ലാം നഷ്ടപരിഹാരം അക്രമികളില്‍ നിന്ന് ഈടാക്കണമെന്നും സി.പി.എം നേതാക്കള്‍ ആവശ്യപ്പെട്ടു. സി.പി.എം പ്രവര്‍ത്തകരും വീടുകളും അക്രമിക്കപ്പെട്ടപ്പോഴും ആത്മസംയമനം പാലിച്ചത് ജില്ലയുടെ സമാധാന അന്തരീക്ഷത്തിനു കോട്ടം വരാതിരിക്കാനാണെന്നും ഇവര്‍ കൂട്ടിച്ചേര്‍ത്തു. സി.പി.എം പ്രവര്‍ത്തകരും പൊലിസുകാരും മാധ്യമപ്രവര്‍ത്തകരുമടക്കം മുപ്പതോളം പേര്‍ക്ക് ബി.ജെ.പി അക്രമത്തില്‍ പരുക്കേറ്റതായും സി.പി.എം ജില്ലാ സെക്രട്ടറിഎം.വി ബാലകൃഷ്ണന്‍, സംസ്ഥാനകമ്മിറ്റിയംഗം കെ.പി സതീഷ്ചന്ദ്രന്‍, ജില്ലാ സെക്രട്ടേറിയറ്റ് അംഗങ്ങളായ എം. രാജഗോപാലന്‍ എം.എല്‍.എ, അഡ്വ.വി.പി.പി മുസ്തഫ വാര്‍ത്താസമ്മേളനത്തില്‍ അറിയിച്ചു.