കാസര്‍കോട്: സംസ്ഥാനത്തെ മുഴുവന്‍ കുടുംബങ്ങള്‍ക്കും ജല അതോറിറ്റി വഴി ശുദ്ധീകരിച്ച കുടിവെളളം ലഭ്യമാക്കുകയാണ് സര്‍ക്കാറിന്റെ ലക്ഷ്യമെന്നു മന്ത്രി മാത്യു ടി തോമസ്. കാസര്‍കോട് താലൂക്കിലെ മുന്നാട്, ബേഡഡുക്ക, കുറ്റിക്കോല്‍ വില്ലേജുകള്‍ക്കു വേണ്ടി ത്വരിത ഗ്രാമീണ ശുദ്ധജല വിതരണ പദ്ധതിയില്‍ ഉള്‍പ്പെടുത്തി പൂര്‍ത്തീകരിച്ച രാമങ്കയം കുടിവെളള പദ്ധതി ഉദ്ഘാടനം ചെയ്യുകയായിരുന്നു അദ്ദേഹം.
പുതിയ സര്‍ക്കാര്‍ കിഫ്ബിയിലുള്‍പ്പെടുത്തി 1500 കോടി രൂപയുടെ കുടിവെളള പദ്ധതികളാണ് ഏറ്റെടുത്തിട്ടുളളത്. നിലവില്‍ സംസ്ഥാനത്ത് 30 ശതമാനം കുടുംബങ്ങള്‍ക്കാണ് ജല അതോറിറ്റി വഴി ശുദ്ധീകരിച്ച ജലം ലഭ്യമാകുന്നത്. മുഴുവന്‍ കുടുംബങ്ങള്‍ക്കും ലഭ്യമാക്കുന്നതിനു വിപുലീകരിച്ച പദ്ധതികള്‍ ആവശ്യമാണ്. അടുത്ത അഞ്ചു വര്‍ഷത്തിനകം 750 ദശലക്ഷം ലിറ്റര്‍ കുടിവെളളം പ്രതിദിനം അധികമായി ലഭ്യമാക്കുന്നതിനുളള പദ്ധതികളാണ് നടപ്പിലാക്കുന്നത്. ബാവിക്കര കുടിവെളള പദ്ധതി യാഥാര്‍ത്ഥ്യമാക്കുന്നതിന് സര്‍ക്കാര്‍ പ്രത്യേക പരിഗണന നല്‍കും. നിലവില്‍ പദ്ധതി നിര്‍മാണമാരംഭിച്ച സ്ഥലത്തു തന്നെ യാഥാര്‍ത്ഥ്യമാക്കും. കുടിവെളളം ഉപയോഗിക്കുന്നതില്‍ പൊതുജനങ്ങള്‍ നിയന്ത്രണം ശീലിക്കണം. സൂക്ഷ്മതയോടെയും സമൂഹത്തോടുളള ഉത്തരവാദിത്വം കണക്കിലെടുത്തുമായിരിക്കണം ശുദ്ധീകരിച്ച ജലം വിനിയോഗിക്കേണ്ടത്.
പളളത്തുങ്കാലില്‍ നടന്ന ചടങ്ങില്‍ കെ കുഞ്ഞിരാമന്‍ എം.എല്‍.എ അധ്യക്ഷനായി. ജല അതോറിറ്റി ചീഫ് എന്‍ജിനീയര്‍ പി.കെ ചന്ദ്രാവതി, കുറ്റിക്കോല്‍ പഞ്ചായത്ത് പ്രസിഡന്റ് പി.ജെ ലിസി, വൈസ് പ്രസിഡന്റ് പി ദാമോദരന്‍ സംബന്ധിച്ചു.