ആലപ്പുഴ: ആലപ്പുഴ മൊബിലിറ്റി ഹബ് ടെന്‍ഡര്‍ നടപടികളിലേക്ക് കടക്കുകയാണെന്നും 700 കോടി അടങ്കല്‍ തുകയുള്ള ഈ പദ്ധതി പൂര്‍ത്തിയാകുന്നതോടെ ആലപ്പുഴയുടെ മുഖച്ഛായതന്നെ മാറുമെന്നും പൊതുമരാമത്ത് മന്ത്രി ജി. സുധാകരന്‍. ആലപ്പുഴ ബോട്ട് ജെട്ടിക്ക് സമീപം ജലഗതാഗതവകുപ്പ് പുതിയതായി നിര്‍മിച്ച അഞ്ചു അത്യാധുനിക യാത്രാ ബോട്ടുകളുടെയും കൈനകരി സര്‍ക്കുലാര്‍ സര്‍വിസിന്റെയും ഉദ്ഘാടനം നിര്‍വഹിച്ച് സംസാരിക്കുകയായിരുന്നു മന്ത്രി.
ആലപ്പുഴയിലെ കെ.എസ്.ആര്‍.ടി.സി, വാട്ടര്‍ ട്രാന്‍സ്‌പോര്‍ട്ട് എന്നിവയെ യോജിപ്പിച്ച് അത്യാധുനിക സൗകര്യങ്ങള്‍ അവര്‍ക്ക് മൊബിലിറ്റി ഹബ്ബില്‍ ഒരുക്കും. ഇതോടൊപ്പം 276 കോടി രൂപ ചെലവഴിച്ച് നഗര റോഡ് വികസന പദ്ധതി നടപ്പാക്കിവരുന്നതായും മന്ത്രി പറഞ്ഞു. ആലപ്പുഴ ബൈപ്പാസ് മെയ് മാസത്തില്‍ തുറക്കാന്‍ കഴിയും.
കരാറുകാരന്റെ വീഴ്ചയും റയില്‍വേയുടെ ഭാഗത്തുനിന്നുള്ള തടസങ്ങളുമാണ് ബൈപ്പാസ് ഉദ്ഘാടനം വൈകാന്‍ കാരണമായത്.
സംസ്ഥാന ജലഗതാഗത വകുപ്പ് ആധുനീകരണത്തിന്റെ പാതയിലാണെന്ന് ജലഗതാഗത മന്ത്രി എ.കെ ശശീന്ദ്രന്‍ അധ്യക്ഷ പ്രസംഗത്തില്‍ പറഞ്ഞു. മൂന്നുമാസത്തിനകം വാട്ടര്‍ ടാക്‌സികള്‍ ആരംഭിക്കും. ഒന്‍പത് കാറ്റമറൈന്‍ ബോട്ടുകള്‍ നിര്‍മാണഘട്ടത്തിലാണ്. രണ്ടുനിലയുള്ള സോളാര്‍ ക്രൂയിസ് ബോട്ട് നിര്‍മാണം ഏപ്രിലില്‍ പൂര്‍ത്തിയാക്കും.
കൂടാതെ എറണാകുളം ചവറ ജല ചരക്കുഗതാഗതത്തിന് പഠനം നടത്തിവരുന്നു. കൈനകരിക്കാര്‍ക്കുള്ള നവവത്സര സമ്മാനമാണ് സര്‍ക്കുലര്‍ ബോട്ട് സര്‍വീസ് എന്നും മന്ത്രി പറഞ്ഞു. കുപ്പപ്പുറം, പാണ്ടിച്ചേരി, കൈനകരി, കുട്ടമംഗലം, വേണാട്ടുകാട്, ചേന്നങ്കരി എന്നീ പ്രദേശങ്ങളിലെ ആളുകള്‍ക്ക് പുതിയ സര്‍വീസ് ഏറെ പ്രയോജനപ്പെടും. ആലപ്പുഴയില്‍ നിന്നും കൈനകരി റോഡ് മുക്കില്‍ എത്തിച്ചേരുന്ന ബസുകളുടെ സമയക്രമം അനുസരിച്ചാണ് ബോട്ടിന്റെ ഷെഡ്യൂള്‍ സമയം ക്രമീകരിച്ചിട്ടുള്ളത്.
അഞ്ച് ആധുനിക സൗകര്യങ്ങളുള്ള സ്റ്റീല്‍ ബോട്ടുകള്‍ക്ക് ഓരോന്നിനും ഒരുകോടി രൂപ ചെലവ് വന്നു. ഒരേസമയം 75 പേര്‍ക്ക് സഞ്ചരിക്കാന്‍ സാധിക്കുന്ന ലക്ഷ്യ ബോട്ടുകളില്‍ യാത്ര സുഖകരമാക്കുന്നതിന് ആവശ്യമായ ആധുനിക സീറ്റുകള്‍, ശബ്ദം കുറഞ്ഞതും വൈബ്രേഷന്‍ കുറഞ്ഞതുമായ എന്‍ജിന്‍ എന്നിവയാണ് ഉപയോഗിച്ചിരിക്കുന്നത്. അത്യാധുനിക സുരക്ഷാ ഉപകരണങ്ങള്‍ ഉള്‍പ്പെടുത്തി നിര്‍മിച്ചിരിക്കുന്ന ബോട്ടുകള്‍ ലോകോത്തര നിലവാരത്തില്‍ ഐ.ആര്‍.എസ്.ക്ലാസിലാണ് നിര്‍മിച്ചിട്ടുള്ളത.് അനുകൂല സാഹചര്യത്തില്‍ 16 കിലോമീറ്റര്‍ വേഗത്തില്‍ ഈ ബോട്ടുകള്‍ക്ക് സഞ്ചരിക്കാന്‍ കഴിയും. ബയോടോയ്‌ലറ്റ് സൗകര്യവും ബോട്ടിലുണ്ട്. സില്‍ക്കാണ് ബോട്ട് നിര്‍മിച്ചത്. ജില്ലാ കലക്ടര്‍ എസ്. സുഹാസ്, ജലഗതാഗത വകുപ്പ് ഡയരക്ടര്‍ ഷാജി വി. നായര്‍, നഗരസഭാംഗം ഡി.ലക്ഷ്മണന്‍, സില്‍ക്ക് മാനേജിങ് ഡയരക്ടര്‍ ചന്ദ്രബോസ്, ട്രാഫിക് സൂപ്രണ്ട് സത്യന്‍ എന്നിവര്‍ സംസാരിച്ചു.