മഞ്ചേരി: യുവാവിനെ അക്രമിച്ച് 15 ലക്ഷം രൂപ കവര്‍ന്ന സംഘത്തിലെ അഞ്ചംഗ ക്വട്ടേഷന്‍ സംഘം മഞ്ചേരിയില്‍ പിടിയിലായി. തൃശൂര്‍ സ്വദേശികളായ മാരോട്ടികുന്ന് സതീഷ് (42), കൊടകര പള്ളത്തേരി ദീപു(32), തയ്യില്‍ അനൂപ്(30), ആമ്പല്ലൂര്‍ കൈപ്പഞ്ചേരി സുനീഷ്(28), മാള കൂട്ടാലപറമ്പില്‍ സുനീഷ്(28) എന്നിവരാണ് പിടിയിലായത്. ബൈക്ക് യാത്രികനായ യുവാവിനെ അക്രമിച്ചാണ് പ്രതികള്‍ 15 ലക്ഷം കവര്‍ന്നത്. ഡിസംബര്‍ 27നാണ് കേസിനാസ്പദമായ സംഭവം. ബൈക്കില്‍ പണവുമായി യാത്ര ചെയ്ത വള്ളുവമ്പ്രം സ്വദേശി ബഷീറിനെ ക്വാളിസ് കാറിലെത്തിയ അഞ്ചംഗ സംഘം ഇടിച്ചുതെറിപ്പിച്ച് വീഴ്ത്തിയശേഷം വാഹനത്തില്‍ കയറ്റികൊണ്ടുപോകുകയായിരുന്നു. പണം തട്ടിയെടുത്തശേഷം ബഷീറിനെ മലപ്പുറത്ത് ഇറക്കിവിട്ടു. വയനാട്ടില്‍ വച്ച് മറ്റൊരു യുവാവിനെ അക്രമിച്ച് പണം കവരാന്‍ ശ്രമിക്കുന്നതിനിടെ നാട്ടുകാര്‍ പിടികൂടി പൊലിസിലേല്‍പ്പിക്കുകയായിരുന്നു.
ഈ കേസുമായി ബന്ധപ്പെട്ട വിശദമായ അന്വേഷണത്തില്‍ വള്ളുവമ്പ്രം സ്വദേശി കോടാലി ലത്തീഫ്, തോരപ്പ നൗഷാദ്, അരീക്കോട് സ്വദേശി അക്ഷയ്, തൃശൂര്‍ സ്വദേശി ലത്തീഫ് എന്നിവരെയും പൊലിസ് പിടികൂടിയിരുന്നു. ഇവരില്‍ നിന്നാണ് അഞ്ചംഗ സംഘത്തെകുറിച്ച് വിവരം ലഭിച്ചത്. പിടിയിലായ ദീപുവിന് കൊല്ലം ജില്ലയില്‍ ആയിരം ലിറ്റര്‍ സ്പിരിറ്റ് കടത്തിയ കേസ് നിലവിലുണ്ട്. ഇവരെ കസ്റ്റഡിയില്‍ വാങ്ങി ചോദ്യം ചെയ്തതില്‍ നിന്നും നിരവധി കേസുകള്‍ക്ക് തുമ്പായിട്ടുണ്ട്.
കോഴിക്കോട് ജ്വല്ലറിയിലേക്ക് സ്വര്‍ണം വാങ്ങാനെത്തിയവരുടെ 18 ലക്ഷം രൂപ കവര്‍ന്ന കേസിലും സ്വര്‍ണവ്യാപാരിയെ അക്രമിച്ച കേസിലും ഇവരുടെ പങ്ക് വ്യക്തമായിട്ടുണ്ട്. മലപ്പുറം, കൊണ്ടോട്ടി, അരീക്കോട് സ്‌റ്റേഷനുകളിലെ വിവിധ കേസുകളിലും പ്രതികള്‍ തെളിവ് നല്‍കിയിട്ടുണ്ട്. കസ്റ്റഡിയില്‍ വാങ്ങിയ പ്രതികളെ തെളിവെടുപ്പിന് ശേഷം കോടതിയില്‍ ഹാജരാക്കി. മഞ്ചേരി സി.ഐ ബിജുവിന്റെ നേതൃത്വത്തില്‍ എസ്.ഐ കൈലാസ്‌നാഥ്, പി സഞ്ജീവ്, ടി ശ്രീകുമാര്‍, ഉണ്ണികൃഷ്ണന്‍, സഞ്ജയ്, സുഭാഷ്, സുബൈര്‍ തുടങ്ങിയ ഉദ്യോഗസ്ഥരാണ് പ്രതികളെ പിടികൂടിയത്.