ഹൈദരാബാദ്: സംസ്ഥാനത്ത് എന്‍.ആര്‍.സി നടപ്പാക്കില്ലെന്ന പ്രഖ്യാപനവുമായി തെലങ്കാനയും. തെലങ്കാനയില്‍ എന്‍.ആര്‍.സി നടപ്പാക്കില്ലെന്ന് ആഭ്യന്തരമന്ത്രി മുഹമ്മദ് മെഹമൂദ് അലി വ്യക്തമാക്കി. അതേസമയം, ലോകമെമ്പാടും അടിച്ചമര്‍ത്തപ്പെടുന്ന ഹിന്ദ ജനവിഭാഗം ഉണ്ടെങ്കില്‍ അവര്‍ക്ക് ഇന്ത്യന്‍ പൗരത്വം നല്‍കണമെന്നും അദ്ദേഹം വ്യക്തമാക്കി. ആദ്യമായാണ് തെലങ്കാന പൗരത്വ വിഷയത്തില്‍ പ്രതികരിക്കുന്നത്. വിഷയത്തില്‍ മുഖ്യമന്ത്രി കെ. ചന്ദ്രശേഖര്‍ റാവു ഒരു പ്രതികരണവും നടത്തിയിട്ടില്ല.

താന്‍ കേന്ദ്ര മന്ത്രി മുക്താര്‍ അബ്ബാസ് നഖ്‌വിയുമായി കൂടിക്കാഴ്ച നടത്തിയിരുന്നുവെന്നും ഇക്കാര്യം പങ്കുവെച്ചിരുന്നുവെന്നും മെഹമൂദ് അലി കൂട്ടിച്ചേര്‍ത്തു.

'ഞാന്‍ കേന്ദ്ര മന്ത്രിയെ കണ്ടിരുന്നു. ലോകത്തെവിടെയും പാകിസ്താനിലും ബംഗ്ലാദേശിലും മാത്രമല്ല, പീഡിപ്പിക്കപ്പെടുന്ന ഹിന്ദുക്കള്‍ക്ക് ഇന്ത്യ പൗരത്വം നല്‍കണം. കാരണം ഇത് ഇന്ത്യയാണ്'-മെഹമൂദ് അലി പറഞ്ഞു.

എന്നാല്‍ എന്തിനാണ് നിങ്ങള്‍ ഈ രാജ്യത്ത് ജീവിക്കുന്ന ജനങ്ങളെ ലക്ഷ്യമിടുന്നതെന്നും പ്രശ്‌നങ്ങള്‍ സൃഷ്ടിക്കുന്നതെന്നും അദ്ദേഹം ചോദിച്ചു. കാലങ്ങളായി ഇവിടെ ജീവിക്കുന്നവരാണിവര്‍. രാജ്യത്തെ ജനങ്ങള്‍ക്കിടയില്‍ അനാവശ്യമായ ആശങ്കകള്‍ സൃഷ്ടിക്കുകയാണ്. ആരുടെ കയ്യിലും ജനനസര്‍ട്ടിഫിക്കറ്റു പോലുമുണ്ടാവില്ല. ഇതെല്ലാം സങ്കീര്‍മായ സാഹചര്യം സൃഷ്ടിക്കുകയാണ്. ഞാന്‍ ഉറപ്പു തരുന്നു. തെലങ്കാനയില്‍ എന്‍.ആര്‍.സി ഉണ്ടാവില്ല- അദ്ദേഹം കൂട്ടിച്ചേര്‍ത്തു.