ജിദ്ദ: കണ്ണൂർ തലശേരി ധർമടം മീത്തൽപ്പീടിക സ്വദേശി കരിപ്പാൽ മുഹമ്മദ് ഷജീർ (36) വാഹനാപകടത്തിൽ മരിച്ചു. ഖുന്ഫുദയിൽ നിന്നും സുഹൃത്ത് മലപ്പുറം എടവണ്ണ സ്വദേശി മുഹമ്മദ് ഷമീമുമൊന്നിച്ചു ജിദ്ദയിലേക്ക് വരുന്ന വഴി ജിദ്ദയിൽ നിന്നും 50 കിലോമീറ്റർ അകലെവെച്ചാണ് അപകടമുണ്ടായത്. ഇവർ സഞ്ചരിച്ച വാഹനം ട്രൈലറുമായി കൂട്ടിയിടിക്കുകയായിരുന്നു. മുഹമ്മദ് ഷജീർ അപകട സ്ഥലത്തുവെച്ചു തന്നെ മരിച്ചു. വാഹനമോടിച്ചിരുന്ന മുഹമ്മദ് ഷമീമിന് നിസാര പരിക്കേറ്റു. ജിദ്ദയിൽ നിന്നും ചരക്കുകൾ എടുത്തു ഖുന്ഫുദയിൽ കച്ചവടം നടത്തിവരികയായിരുന്നു മരിച്ച മുഹമ്മദ് ഷജീർ. മഹ്ജർ കിംഗ് അബ്ദുൽ അസീസ് ആശുപത്രിയിൽ സൂക്ഷിച്ചിരിക്കുന്ന മൃതദേഹം നടപടിക്രമങ്ങൾക്കു ശേഷം ജിദ്ദയിൽ ഖബറടക്കുമെന്നു ജിദ്ദയിലുള്ള സഹോദരൻ ഷജ്‌മീർ അറിയിച്ചു. ഹർഷിനയാണ് ഭാര്യ. രണ്ട് ആൺകുട്ടികളും ഒരു പെൺകുട്ടിയുമുണ്ട്.