കോഴിക്കോട്: കോഴിക്കോട് മിഠായിത്തെരുവില്‍ തീപിടിത്തം. മിഠായിത്തെരുവിലെ മോഡേണ്‍ ടെക്‌സ്റ്റയില്‍സിനാണ് തീപിടിച്ചത്.ബീച്ച്, വെള്ളിമാട് കുന്ന് സ്‌റ്റേഷനുകളില്‍ നിന്ന് ആറു യൂണിറ്റോളം അഗ്‌നിശമനസേന എത്തിയാണ് തീയണച്ചത്. രണ്ടര മണിക്കൂറെടുത്താണ് തീ നിയന്ത്രണവിധേയമാക്കിയത്. കെട്ടിടത്തിന്റെ മൂന്നാം നിലയില്‍ അഞ്ച് പാചകവാതക സിലിണ്ടറുകള്‍ ഉണ്ടായിരുന്നത് പരിഭ്രാന്തി പരത്തി. എട്ട് കടമുറികള്‍ പൂർണമായും കത്തിനശിച്ചു. 

രാവിലെ 11.30ഓടെയാണ് തീപിടിത്തമുണ്ടായത്. ഷോര്‍ട്ട് സര്‍ക്യൂട്ടാവാം അപകട കാരണമെന്നാണ് പ്രാഥമിക നിഗമനം. പകല്‍ സമയമായതിനാല്‍ ജനത്തിരക്കേറെയായിരുന്നു. കടയിലും ആളുകളെത്തിയിരുന്നു. തീപിടിത്തമുണ്ടായ ഉടനെ ആളുകളെ ഒഴിപ്പിച്ചു. ആര്‍ക്കും പരുക്കേറ്റതായി അറിവില്ല. നിരവധി കടകളും സിനിമാ തിയറ്ററും തൊട്ടടുത്ത് ഉള്ളതിനാല്‍ തീ പടരുന്നത് ആശങ്കയുണ്ടാക്കി.കരിപ്പൂര്‍ വിമാനത്താവളത്തില്‍നിന്നുള്ള പ്രത്യേക അഗ്നിശമന വാഹനവും തീയണക്കാനായി സംഭവസ്ഥലത്തെത്തിയിരുന്നു. 

 കലക്ടര്‍ യു.വി ജോസും എം.കെ രാഘവന്‍ എം.പിയും സംഭവസ്ഥലം സന്ദർശിച്ചു. കോടിക്കണക്കിന് രൂപയുടെ നാശനഷ്ടങ്ങളാണ് കണക്കാക്കുന്നത്. അടുത്ത കടകളിലേക്ക് തീ പടരാതെ സംരക്ഷിക്കാന്‍ സാധിച്ചതിനാല്‍ വലിയ ദുരന്തമൊഴിവായി.