കോഴിക്കോട്: ഉത്തരമേഖല എ.ഡി.ജി.പിയായി സുദേഷ്‌കുമാര്‍ ചുമതലയേറ്റു. ഇന്നലെ ഉച്ചയ്ക്ക് 12.30ഓടെ കോഴിക്കോട് നടക്കാവിലെ എ.ഡി.ജി.പി ഓഫിസിലെത്തിയാണ് അദ്ദേഹം ചുമതലയേറ്റത്. ഐ.ജി ദിനേന്ദ്ര കശ്യപ്, കമ്മിഷണര്‍ ഉമാ ബെഹ്‌റ തുടങ്ങിയവര്‍ സന്നിഹിതരായിരുന്നു.
1987 ബാച്ചിലെ ഐ.പി.എസ് ഓഫിസറായ സുദേഷ് മൂന്നുതവണ ബി.എസ്.എഫ് ഐ.ജിയായിരുന്നു. പഞ്ചാബ് സ്വദേശിയാണ്. എസ്.പി, ഡി.ഐ.ജി, ഐ.ജി തസ്തികകളില്‍ കേരളത്തില്‍ പ്രവര്‍ത്തിച്ചു. സി.ഐ.എസ്.എഫ് ഡി.ഐ.ജി ആയിരിക്കേ എല്ലാ സര്‍ക്കാര്‍ സ്ഥാപനങ്ങള്‍ക്കും സുരക്ഷ ഉറപ്പാക്കുന്നതിനുള്ള പദ്ധതി നടപ്പാക്കി. ദേശീയ ദുരന്തനിവാരണ സേനയിലും പ്രവര്‍ത്തിച്ചിട്ടുണ്ട്.
മികച്ച സേവനത്തിനുള്ള രാഷ്ട്രപതിയുടെ പൊലിസ് മെഡലിന് 2003ല്‍ അര്‍ഹനായിട്ടുണ്ട്. എം.എ, എം.ബി.എ ബിരുദധാരിയായ സുദേഷ്‌കുമാറിന് ഫ്രഞ്ചില്‍ ഡിപ്ലോമയുമുണ്ട്.