ധര്‍മശാല: രഞ്ജി ട്രോഫി ക്രിക്കറ്റില്‍ കേരളത്തിനെതിരേ ഹിമാചല്‍ പ്രദേശ് പൊരുതുന്നു. ഒന്നാംദിനം മത്സരം അവസാനിച്ചപ്പോള്‍ ഏഴ് വിക്കറ്റ് നഷ്ടത്തില്‍ 257 റണ്‍സാണ് ഹിമാചല്‍ നേടിയത്. 89 റണ്‍സുമായി അങ്കിത് കല്‍സിയും 11 റണ്‍സുമായി പങ്കജ് ജെയ്‌സ്വാളുമാണ് ക്രീസില്‍.
ടോസ് നേടിയ കേരളം ബൗളിങ് തിരഞ്ഞെടുക്കുകയായിരുന്നു. ക്യാപ്റ്റന്‍ സച്ചിന്‍ ബേബിയുടെ തീരുമാനം തെറ്റിയില്ല. ഹിമാചല്‍ സ്‌കോര്‍ ഏഴില്‍ നില്‍ക്കെ ഓപ്പണിങ് ബാറ്റ്‌സ്മാന്‍ രാഘവ് ധവാനെ (2 ) ബേസില്‍ തമ്പി മുഹമ്മദ് അസ്ഹറുദ്ധീന്റെ കൈകളിലെത്തിച്ചു. തുടക്കം പതറിയ ഹിമാചലിന് ഇടവേളകളില്‍ വിക്കറ്റുകള്‍ നഷ്ടപ്പെട്ടു. 82ന് നാല് വിക്കറ്റ് നഷ്ടപ്പെട്ട് തകര്‍ച്ച നേരിട്ട ഹിമാചലിനെ മധ്യനിരയില്‍ അങ്കിത് കല്‍സി - ഋഷി ധവാന്‍ സഖ്യമാണ് പൊരുതാവുന്ന സ്‌കോറിലെത്തിച്ചത്. 80 പന്തുകള്‍ നേരിട്ട് 58 റണ്‍സ് നേടിയ ഋഷിയെ നിതീഷ് എം.ഡിയാണ് വിക്കറ്റിനു മുന്നില്‍ കുരിക്കിയത്. നാല് വിക്കറ്റ് വീഴത്തിയ നിതീഷ് തന്നെയാണ് ഒന്നാംദിനം ഹിമാചലിനെ തകര്‍ത്തത്. കേരളത്തിന് വേണ്ടി സന്ദീപ് വാര്യര്‍ രണ്ട് വിക്കറ്റും ബേസില്‍ തമ്പി ഒരു വിക്കറ്റും സ്വന്തമാക്കി. പ്രശാന്ത് ചോപ്ര (23), അങ്കുഷ് ബൈന്‍സ് (10), നിഖില്‍ ഗങ്ട (28), അമിത് കുമാര്‍ (23) എന്നിവരുടെ വിക്കറ്റുകളും ഹിമാചലിന് നഷ്ടമായത്.