സിഡ്‌നി: ഓസീസ് മണ്ണില്‍ പരമ്പര വിജയം, കോഹ്‌ലിപ്പട രചിച്ചിരിക്കുന്നു ആ ചരിത്രം. 2-1 ന് പരമ്പര ഇന്ത്യ കൈപ്പിടിയിലൊതുക്കിയപ്പോള്‍ കാറ്റില്‍ പറന്നത് 71 വര്‍ഷത്തെ കാത്തിരിപ്പും ആസ്‌ത്രേലിയയില്‍ പരമ്പര വിജയം നേടുന്ന ആദ്യ ഏഷ്യന്‍ ടീമെന്ന ബഹുമതിയും.
ഇതുവരെ ആസ്‌ത്രേലിയയില്‍ 11 ടെസ്റ്റ് പരമ്പരകള്‍ കളിച്ച ടീം ഇന്ത്യക്ക് ആശ്വാസമായുള്ളത് ബിഷന്‍ സിങ് ബേദിയുടെയും സൗരവ് ഗാംഗുലിയുടെയും ടീമുകള്‍ നേടിയ സമനിലകള്‍ മാത്രമായിരുന്നു.
ബാക്കി ഒന്‍പതിലും തോല്‍വിയായിരുന്നു ഫലം. പരമ്പരയില്‍ മൂന്ന് വിജയം നേടാനാകുമായിരുന്ന ഇന്ത്യക്ക് നാലാം ടെസ്റ്റില്‍ മഴയാണ് വില്ലനായത്.
സിഡ്‌നിയില്‍ നടന്ന നാലാം ടെസ്റ്റിന്റെ അഞ്ചാം ദിനത്തിലും മഴ പെയ്തതോടെ മത്സരം സമനിലയില്‍ അവസാനിപ്പിക്കുകയായിരുന്നു. അഡലെയ്ഡില്‍ നടന്ന ആദ്യ ടെസ്റ്റിലും മെല്‍ബണില്‍ നടന്ന മൂന്നാം ടെസ്റ്റിലുമാണ് ഇന്ത്യ വിജയിച്ചത്. പെര്‍ത്തിലെ രണ്ടാം ടെസ്റ്റില്‍ ആസ്‌ത്രേലിയക്കായിരുന്നു വിജയം.
പരമ്പരയില്‍ മൂന്ന് സെഞ്ചുറിയുമായി ഇന്ത്യന്‍ വിജയത്തില്‍ നിര്‍ണായക പങ്കു വഹിച്ച ചേതേശ്വര്‍ പൂജാരയാണ് മാന്‍ ഓഫ് ദ സീരീസ്. ഏഴ് ഇന്നിങ്‌സുകളില്‍ നിന്നായി 1258 പന്തുകള്‍ നേരിട്ട് 521 റണ്‍സാണ് പൂജാര നേടിയത്.
ഇന്ത്യയുടെ ബൗളര്‍മാരും കൃത്യതയോടെ പന്തെറിഞ്ഞപ്പോള്‍ ഓസീസ് മണ്ണില്‍ ടെസ്റ്റ് പരമ്പര വിജയിക്കുന്ന ഏഷ്യന്‍ ക്യാപ്റ്റന്‍ എന്ന ബഹുമതി കോഹ്‌ലിക്ക് സ്വന്തം.
വില്ലനായെത്തിയ മഴ

സിഡ്‌നിയില്‍ നടന്ന നാലാം ടെസ്റ്റില്‍ ഇന്ത്യന്‍ ബാറ്റ്‌സ്മാന്‍മാര്‍ റണ്‍മഴ തീര്‍ത്തപ്പോള്‍ തന്നെ ഇന്ത്യ വിജയം ഉറപ്പിച്ചതായിരുന്നു. ഒപ്പം ബൗളിങ്ങിലും ഇന്ത്യ തിളങ്ങിയതോടെ 3-1ന് ഇന്ത്യ പരമ്പര സ്വന്തമാക്കുമെന്ന് തോന്നിപ്പിച്ച നിമിഷങ്ങള്‍. ആദ്യ ഇന്നിങ്ങ്‌സില്‍ 300 റണ്‍സിന് പുറത്തായ ആതിഥേയര്‍ ഫോളോഓണ്‍ വഴങ്ങിയിരുന്നു.
നാലാം ദിവസം മഴയെത്തിയതോടെ ഇന്ത്യയുടെ വിജയപ്രതീക്ഷകള്‍ ഏറെക്കുറെ അസ്തമിച്ചു. ഫോളോഓണ്‍ ചെയ്യുന്ന ആസ്‌ത്രേലിയ നാല് ഓവറില്‍ വിക്കറ്റൊന്നും നഷ്ടപ്പെടാതെ ആറ് റണ്‍സില്‍ നില്‍ക്കുമ്പോഴാണ് മഴയുടെ വരവ്. മഴ മാറിയതോടെ വെളിച്ചക്കുറവ് മൂലം കളി നേരത്തെ അവസാനിപ്പിച്ചു. അഞ്ചാംദിനം മഴ കനത്തതോടെ മത്സരം സമനിലയില്‍ അവസാനിപ്പിക്കുകയായിരുന്നു. എങ്കിലും 31 വര്‍ഷങ്ങള്‍ക്കുശേഷം നാട്ടില്‍ ഓസീസിനെ ഫോളോ ഓണ്‍ ചെയ്യിക്കുന്ന ടീം എന്ന ഖ്യാതിയോടെയാണ് ഇന്ത്യ തിരിച്ചുകയറിയത്.

പുതുജീവന്‍ നല്‍കി മായങ്ക്

ഒരു ഘട്ടത്തില്‍ രണ്ടാം ടെസ്റ്റില്‍ പരാജയപ്പെട്ട് പരമ്പര നഷ്ട ഭീഷണി നേരിട്ട ഇന്ത്യയെ കൈപിടിച്ചുയര്‍ത്തിയത് ഓപ്പണിങ് ബാറ്റ്‌സ്മാന്‍ മായങ്ക് അഗര്‍വാളാണ്. പരമ്പരയില്‍ മോശം പ്രകടനം കാഴ്ചവച്ച ഓപ്പണിങ് ബാറ്റ്‌സ്മാന്‍ ലോകേഷ് രാഹുലിന് പകരം ടീമിലെത്തിയ മായങ്ക് മൂന്ന് ഇന്നിങ്‌സിലും ഇന്ത്യക്ക് മികച്ച തുടക്കമാണ് നല്‍കിയത്.
മൂന്ന് ഇന്നിങ്‌സുകളില്‍ നിന്ന് 195 റണ്‍സാണ് മായങ്കിന്റെ സമ്പാദ്യം. മെല്‍ബണില്‍ നടന്ന ആദ്യ ഇന്നിങ്‌സില്‍ 76 റണ്‍സ് നേടിയ മായങ്ക് രണ്ടാം ഇന്നിങ്‌സില്‍ 42 റണ്‍സ് നേടിയിരുന്നു. സിഡ്‌നിയില്‍ നടന്ന അവസാന ടെസ്റ്റില്‍ 77 റണ്‍സ് നേടി മികച്ച തുടക്കം സമ്മാനിച്ചതും മായങ്ക് അഗര്‍വാളാണ്. രണ്ടാം വിക്കറ്റില്‍ പൂജാരയോടൊപ്പം 116 റണ്‍സിന്റെ കൂട്ടുകെട്ടാണ് മായങ്ക് പടുത്തുയര്‍ത്തിയത്.

പൂജാര - പന്ത് - ജഡേജ

ചേതേശ്വര്‍ പൂജാര, ഋഷഭ് പന്ത്, ജഡേജ എന്നിവരാണ് സിഡ്‌നിയില്‍ ഇന്ത്യക്ക് കൂറ്റന്‍ സ്‌കോര്‍ സമ്മാനിച്ചത്. മൂവരും മികച്ച രീതിയില്‍ ബാറ്റ് വീശിയതോടെ ഇന്ത്യ ഏഴ് വിക്കറ്റ് നഷ്ടത്തില്‍ 622 റണ്‍സെന്ന പടുകൂറ്റന്‍ സ്‌കോറിലെത്തി. ഇരട്ട സെഞ്ചുറിക്ക് ഏഴ് റണ്‍സ് അകലെയാണ് പൂജാര (193) പുറത്തായത്. ജഡേജ (81) റണ്‍സില്‍ വിക്കറ്റ് നഷ്ടപ്പെടുത്തിയപ്പോള്‍ പന്ത് (159) പുറത്താവാതെ നിന്നു. ജഡേജ - ഋഷഭ് പന്ത് നേടിയ 204 റണ്‍സിന്റെ തകര്‍പ്പന്‍ കൂട്ടുകെട്ടാണ് ഇന്ത്യന്‍ ഇന്നിങ്‌സിന്റെ നട്ടെല്ലായത്.

കുല്‍ദീപ് മാജിക്

ബൗളിങ്ങിലെ ചൈനാമാന്‍ കുല്‍ദീപ് യാദവിന്റെ തകര്‍പ്പന്‍ പ്രകടനം ഓസീസ് സ്വപ്നങ്ങള്‍ കാറ്റില്‍ പറത്തി. ഒരുഘട്ടത്തില്‍ പരമ്പര സമനിലയിലാക്കാനുറച്ചെത്തിയ ആസ്‌ത്രേലിയയുടെ തുടക്കം മികച്ചതായിരുന്നെങ്കിലും കുല്‍ദീപ്, ജഡേജ, ഷമി സഖ്യത്തിന്റെ ബൗളിങ്ങിന് മുന്‍പില്‍ ഓസീസ് തകര്‍ന്നടിഞ്ഞു. അഞ്ച് വിക്കറ്റ് നേടി കുല്‍ദീപ് യാദവും രണ്ട് വിക്കറ്റുകളുമായി ഷമി, ജഡേജ സഖ്യവും കളം നിറഞ്ഞു.