പനമരം: പനമരം ബ്ലോക്ക് പഞ്ചായത്തിലെ പാക്കം ഡിവിഷനില്‍ നടന്ന ഉപതെരഞ്ഞെടുപ്പില്‍ യു.ഡി.എഫ് സീറ്റ് നിലനിര്‍ത്തി. കഴിഞ്ഞ തെരഞ്ഞെടുപ്പിനേക്കാള്‍ ഭൂരിപക്ഷത്തിനാണ് യു.ഡി.എഫിന്റെ ജയം. യു.ഡി.എഫിലെ മണി ഇല്ലമ്പത്ത് എല്‍.ഡി.എഫിലെ ഇ.എ ശങ്കരനെക്കാള്‍ 97 വോട്ടിന് പിന്തള്ളിയാണ് യു.ഡി.എഫ് കോട്ട തകരാതെ കാത്തത്. കഴിഞ്ഞ തവണ യു.ഡി.എഫിലെ അര്‍ജുന്‍ കെ രാഘവന്‍ 52 വോട്ടിന്റെ ഭൂരിപക്ഷത്തിനായിരുന്നു വിജയിച്ചത്. പാക്കം ഡിവിഷനില്‍ മൊത്തം 8862 വോട്ടര്‍മാരാണുള്ളത്. ഇതില്‍ പോള്‍ ചെയ്തത് 5717 വോട്ട്. യു.ഡി.എഫ് സ്ഥാനാര്‍ഥി മണി ഇല്ലമ്പത്തിന് 2671 വോട്ട് ലഭിച്ചപ്പോള്‍, ഇടതുസ്ഥാനാര്‍ഥി ഇ.എ ശങ്കരന് 2574 വോട്ടാണ് ലഭിച്ചത്. ബി.ജെ.പി സ്ഥാനാര്‍ഥിക്ക് ലഭിച്ചത് 356 വോട്ട് മാത്രമാണ്. ഭൂരിഭാഗം ബൂത്തുകളിലും യു.ഡി.എഫ് സ്ഥാനാര്‍ഥിക്കാണ് മേല്‍ക്കൈ നേടാന്‍ കഴിഞ്ഞത്. പുല്‍പ്പള്ളി പഞ്ചായത്തിലെ പാക്കം, മരക്കാവ്, ആലൂര്‍കുന്ന് എന്നിവടങ്ങളില്‍ യു.ഡി.എഫിന് വ്യക്തമായ മൂന്‍തൂക്കം ലഭിച്ചു. അലൂര്‍കുന്ന്, മരകാവ്, പാക്കം, നീര്‍വാരം, ചെറുകാട്ടൂര്‍, അമ്മാനി എന്നീ വാര്‍ഡുകള്‍ ഉള്‍പെടുന്നതാണ് പാക്കം ഡിവിഷന്‍. കേരളാ സര്‍ക്കാറിന്റെ ഭരണത്തിനെതിരെയുള്ള ജനവികാരമാണ് ഈ തെരഞ്ഞെടുപ്പില്‍ പ്രതിഫലിച്ചതെന്നും തിരഞ്ഞെടുപ്പ് കമ്മിറ്റി ചെയര്‍മാന്‍ ദിലീപ്കുമാര്‍, കണ്‍വീനര്‍ പി.കെ അസ്മത്ത് പറഞ്ഞു. വോട്ടെണ്ണല്‍ ഇന്നലെ രാവിലെ ഒന്‍പതു മുതല്‍ പനമരം എല്‍.പി സ്‌കൂളിലാണ് നടന്നത്.