വന്‍മരങ്ങള്‍ കടപുഴകി, വ്യാപക കൃഷിനാശം

ഇരുപതോളം വീടുകള്‍ തകര്‍ന്നു

വൈദ്യുതിബന്ധം പൂര്‍ണമായി നിലച്ചു

ശാസ്താംകോട്ട: പോരുവഴി പഞ്ചായത്തില്‍ ഇന്നലെയുണ്ടായ ശക്തമായ ചുഴലിക്കാറ്റ് വ്യാപക നാശംവിതച്ചു.
പള്ളിമുറി കൊല്ലശേരില്‍, വഞ്ചിപ്പുറം ഭാഗങ്ങളിലാണ് ചുഴലിക്കാറ്റ് ആഞ്ഞുവീശിയത്. ഇവിടെ  വന്‍മരങ്ങള്‍ കടപുഴകി പത്തോളം വീടുകള്‍ പൂര്‍ണമായും പതിനൊന്ന് വീടുകള്‍ ഭാഗികമായും തകര്‍ന്നു.  വൈദ്യുതിബന്ധം പൂര്‍ണമായി തകരുകയും ചെയ്തു. പരിമണത്ത് കിഴക്കതില്‍ രവീന്ദ്രന്‍പിള്ള, വഞ്ചിപ്പുറത്ത് സദാശിവന്‍പിള്ള, ഓമനക്കുട്ടന്‍പിള്ള, മഠത്തില്‍ കിഴക്കതില്‍ ഓമനക്കുട്ടന്‍പിള്ള,  സുധാഭവനത്തില്‍ മോഹനന്‍,  ശാന്തിഭവനത്തില്‍ ശാന്തീകൃഷ്ണ, പട്ടന്റയ്യത്ത് സുരേന്ദ്രന്‍പിള്ള,  മാവേന്റയ്യത്ത് മോഹനന്‍,  വലിയവീട്ടില്‍ തെക്കതില്‍ കൃഷ്ണപിള്ള, രതീഷ്ഭവനം സുരേന്ദ്രന്‍പിള്ള,  വല്ലാറ്റൂര്‍കിഴക്കതില്‍ കൃഷ്ണകുമാര്‍ എന്നിവരുടെ വീടുകളാണ് പൂര്‍ണമായുംതകര്‍ന്നത്.
കുളത്തിന്റെ മേലേതില്‍  ശോഭ, വലിയവീട്ടില്‍ തെക്കതില്‍ ജയലക്ഷ്മി, വലിയവീട്ടില്‍ തെക്കതില്‍ ഉണ്ണിക്കുറുപ്പ്, ആര്‍.കെ സദനം രത്‌നാകരന്‍പിള്ള, കുളത്തിന്റെ മേലേതില്‍ രാമചന്ദ്രന്‍പിള്ള, പട്ടന്റയ്യത്ത് ഉണ്ണികുറുപ്പ്,അച്ചുഭവനം ശിവശങ്കരപിള്ള,  ചൈത്രം രഘുനാഥന്‍നായര്‍, വിളയില്‍ ശ്രീകുമാര്‍,  വഞ്ചിപ്പുറം സദാശിവന്‍പിള്ള, മഹേഷ്ഭവനം മഹേഷ് എന്നിവരുടെ വീടുകള്‍ ഭാഗികമായും തകര്‍ന്നു.
രാവിലെ 11 ന് മണിയോടെ ശക്തമായ മഴക്കൊപ്പം ആഞ്ഞുവീശിയ ചുഴലിക്കാറ്റില്‍ തകര്‍ന്ന വീടുകളില്‍ മിക്കതും ഓട് മേഞ്ഞതും ഷീറ്റിട്ടവയും ആയിരുന്നു. വന്‍മരങ്ങള്‍ കോണ്‍ക്രീറ്റ് വീടുകള്‍ക്ക് മുകളില്‍ പതിച്ചതാണ് പതിനൊന്ന് വീടുകള്‍ ഭാഗികമായി തകര്‍ന്നത്. പത്തോളം വീടുകള്‍ പൂര്‍ണമായും തകര്‍ന്നെങ്കിലും ആളപയാമില്ല. ആഞ്ഞുവീശിയ ചുഴലിക്കാറ്റില്‍ കടുവിങ്കല്‍ ഉള്‍പ്പടെയുള്ള ഏലാകളില്‍ വന്‍കൃഷിനാശവും സംഭവിച്ചു. ഏത്തവാഴ, മരച്ചീനി, ചേന, വെറ്റിലകൃഷി, പയര്‍വര്‍ഗങ്ങള്‍ ഉള്‍പ്പടെയുള്ള പച്ചക്കറികളും വന്‍തോതില്‍ നശിച്ചിട്ടുണ്ട്. പതിനായിരക്കണക്കിന്  ഏത്തവാഴകളാണ് നശിച്ചത്. ഓണവിപണി ലക്ഷ്യമാക്കി നടത്തിയ കൃഷിയാണ് പൂര്‍ണമായും നശിച്ചത്.
പ്രദേശത്തെ വൈദ്യുതി ബന്ധവും പൂര്‍ണമായും നിലച്ചു. അന്‍പതോളം  ഇലക്ടിക്ക് പോസ്റ്റുകള്‍ നിലംപതിച്ചു. രാത്രി വൈകിയും രക്ഷാപ്രവര്‍ത്തനങ്ങള്‍ തുടരുകയാണ്. തകര്‍ന്ന വൈദ്യുതിബന്ധം പുന:സ്ഥാപിക്കാന്‍ ദിവസങ്ങളെടുക്കുമെന്നാണ് കരുതുന്നത്. നാശനഷ്ടത്തിന്റെ യഥാര്‍ഥ കണക്ക് തിട്ടപ്പെടുത്തിയിട്ടില്ല. കുണ്ടറ, ശാസ്താംകോട്ട എന്നിവിടങ്ങളില്‍ നിന്നും എത്തിയ ഫയര്‍ഫോഴ്‌സും നാട്ടുകാരും രക്ഷാപ്രവര്‍ത്തനത്തില്‍ ഏര്‍പ്പെട്ടു. കോവൂര്‍കുഞ്ഞുമോന്‍ എം.എല്‍.എ അടക്കമുള്ള ജനപ്രതിനിധികളും വിവിധ രാഷ്ട്രീയ കക്ഷി നേതാക്കളും സ്ഥലംസന്ദര്‍ശിച്ചു.
കുന്നത്തൂര്‍ തഹസില്‍ദാര്‍, പോരുവഴിവില്ലേജോഫിസര്‍ തുടങ്ങിയവര്‍ സ്ഥലത്ത് ക്യാംപ് ചെയ്ത് രക്ഷാപ്രവര്‍ത്തനത്തിന് നേതൃത്വംനല്‍കി. അതിനിടെ ചുഴലിക്കാറ്റ് നാശംവിതച്ച മേഖലയില്‍ ദുരിതാശ്വാസ നടപടികള്‍ ഊര്‍ജിതപ്പെടുത്തുന്നതിന് ജില്ലാകലക്ടറുമായി ബന്ധപ്പെട്ടതായി കോവൂര്‍കുഞ്ഞുമോന്‍ എം.എല്‍.എ അറിയിച്ചു. വീടുകള്‍ പൂര്‍ണമായും തകര്‍ന്നവരെ മാറ്റിപ്പാര്‍പ്പിക്കുന്നതിനുള്ള നടപടികള്‍ സ്വീകരിക്കുന്നതിന് ബന്ധപ്പെട്ട ഉദ്യോഗസ്ഥരെ ചുമതലപ്പെടുത്തിയതായും അദ്ദേഹംപറഞ്ഞു.