മാഡ്രിഡ്: യുവേഫ ചാംപ്യന്‍സ് ലീഗ് പ്രീ ക്വാര്‍ട്ടര്‍ ആദ്യപാദ പോരാട്ടത്തില്‍ ഇറ്റാലിയന്‍ കരുത്തരായ യുവന്റസ്, സ്പാനിഷ് ടീം സെവിയ്യ വിജയിച്ചു. എവേ പോരാട്ടത്തില്‍ പോര്‍ച്ചുഗല്‍ ടീം പോര്‍ട്ടോയെ മറുപടിയില്ലാത്ത രണ്ടു ഗോളുകള്‍ക്ക് വീഴ്ത്തിയാണു യുവന്റസ് കരുത്തു കാട്ടിയത്. സ്വന്തം തട്ടകത്തില്‍ നടന്ന പോരാട്ടത്തില്‍ ഇംഗ്ലീഷ് ചാംപ്യന്‍മാരായ ലെയ്സ്റ്റര്‍ സിറ്റിയെ 2-1നു പാരജയപ്പെടുത്തിയാണു സെവിയ്യയുടെ വിജയം.
കളി ആദ്യ അര മണിക്കൂര്‍ പിന്നിടും മുന്‍പ് തന്നെ അലക്‌സ് ടെല്ലസ് രണ്ടു മഞ്ഞ കാര്‍ഡും അതുവഴി ചുവപ്പ് കാര്‍ഡും വാങ്ങി കളം വിട്ടത് പോര്‍ട്ടോയെ പിന്നോട്ടടിച്ചു. പിന്നീട് പത്തു പേരുമായി ചുരുങ്ങിയ അവര്‍ പ്രതിരോധപ്പൂട്ടിലൂടെ പിടിച്ചു നിന്നെങ്കിലും കളിയുടെ അവസാന ഘട്ടത്തില്‍ രണ്ടു ഗോളുകള്‍ തുടരെ വഴങ്ങിയാണ് പരാജയം ഏറ്റുവാങ്ങിയത്. യുവന്റസിനായി മാര്‍കോ ജക്ക 72ാം മിനുട്ടിലും ഡാനി ആല്‍വ്‌സ് 74ാം മിനുട്ടിലും വല ചലിപ്പിച്ച് അവരുടെ വിജയം ആധികാരികമാക്കുകയായിരുന്നു. രണ്ട് എവേ ഗോള്‍ നേടിയതിന്റെ കരുത്തില്‍ യുവന്റസ് ക്വാര്‍ട്ടര്‍ ബര്‍ത്ത് ഏതാണ്ടുറപ്പിച്ചാണു കളം വിട്ടത്.
ചരിത്രത്തിലാദ്യമായി ചാംപ്യന്‍സ് ലീഗ് പ്രീ ക്വാര്‍ട്ടര്‍ കളിക്കാനിറങ്ങിയ ലെയസ്റ്റര്‍ സിറ്റി പരാജയപ്പെട്ടെങ്കിലും എവേ പോരാട്ടത്തില്‍ ഒരു ഗോള്‍ നേടിയതിന്റെ നേരിയ മുന്‍തൂക്കം അവര്‍ക്കു സ്വന്തമാക്കാനായി. സ്പാനിഷ് ടീം സെവിയ്യക്കെതിരേ അവരുടെ തട്ടകത്തില്‍ കളിക്കാനിറങ്ങിയ ഇംഗ്ലീഷ് ചാംപ്യന്‍മാര്‍ ആദ്യ രണ്ടു പകുതികളിലായി വഴങ്ങിയ രണ്ടു ഗോളിനു പിന്നിലായിരുന്നു. എന്നാല്‍ 73ാം മിനുട്ടില്‍ ക്ലോസ് റേഞ്ച് ഷോട്ടിലൂടെ ജാമി വാര്‍ഡി ലെയ്സ്റ്ററിനു എവേ ഗോള്‍ സമ്മാനിക്കുകയായിരുന്നു. സ്വന്തം തട്ടകത്തില്‍ നടക്കുന്ന രണ്ടാം പാദ പോരാട്ടത്തില്‍ ആത്മവിശ്വാസത്തോടെ ഇറങ്ങാന്‍ ലെയ്സ്റ്ററിനു ഈ ഗോള്‍ ഉപകാരപ്പെടും.