ന്യൂഡല്‍ഹി: പൗരത്വ ഭേദഗതി നിയമം റദ്ദ് ചെയ്യണമെന്ന് ആവശ്യപ്പെട്ടുകൊണ്ട് സമസ്ത കേരള ജംഇയ്യത്തുല്‍ ഉലമ സുപ്രിംകോടതിയില്‍ ഫയല്‍ ചെയ്ത റിട്ട് ഹരജി സിവില്‍ നമ്പര്‍ 60 ഓഫ് 2020 സമസ്ത കേരള ജംഇയ്യത്തുല്‍ ഉലമ വേഴ്‌സസ് യൂനിയന്‍ ഓഫ് ഇന്ത്യ ഹരജി നാളെ ചീഫ് ജസ്റ്റിസ് എസ്. എ ബോബ്‌ഡെ അധ്യക്ഷനായ ബെഞ്ച് പരിഗണിക്കും.

ഇന്ത്യന്‍ പൗരത്വത്തിന് മതം മാനദണ്ഡമാക്കിയുള്ള നിയമ നിര്‍മ്മാണം ഭരണഘടനയുടെ അടിസ്ഥാനഘടനക്ക് നിരക്കാത്തതാണെന്നും അതുകൊണ്ട് തന്നെ പ്രഥമദൃഷ്ട്യാ റദ്ദാക്കപ്പെടേണ്ടതാണെന്നും ഹരജിയില്‍ വ്യക്തമാക്കിയിട്ടുണ്ട്. ഭേഭഗതി ചെയ്യപ്പെട്ട നിയമത്തിലെ മതപരമായ വേര്‍തിരിവും അയല്‍രാജ്യങ്ങളെ നിര്‍ണ്ണയിച്ചതും തികച്ചും യുക്തിരഹിതമാണെന്നും ഹരജിയില്‍ ആരോപിക്കുന്നു. പൗരത്വ സംബന്ധമായ ഭരണഘടനയിലെ 5 മുതല്‍ 11 വരെയുള്ള അനുഛേദങ്ങളിലോ, 1955 ലെ പൗരത്വ നിയമത്തിലോ സൂചിപ്പിച്ചിട്ടില്ലാത്ത ഇത്തരമൊരു മാനദണ്ഡം ഇപ്പോള്‍ അവതരിപ്പിക്കുന്നത് രാജ്യത്ത് സാമുദായിക ധ്രുവീകരണം ലക്ഷ്യം വച്ചാണെന്നും അത് രാജ്യത്തിന്റെ അഖണ്ഡതക്ക് ഭീഷണിയാണെന്നും ഹരജിക്കാരന്‍ വാദിക്കുന്നു.

സീനിയര്‍ അഡ്വക്കേറ്റ് ഗോപാല്‍ ശങ്കരനാരായണന്‍, മുഹമ്മദ് ത്വയിബ് ഹുദവി ഉള്‍പ്പെടെ നാലംഗ അഭിഭാഷക സംഘമായിരിക്കും സമസ്തയ്ക്ക് വേണ്ടി ഹാജരാവുക.