കൊണ്ടോട്ടി: ദുബൈയില്‍ നിന്ന് ഷീറ്റുകളാക്കി ഒളിപ്പിച്ചു കടത്തിയ സ്വര്‍ണവുമായി പുറത്തു കടന്ന യാത്രക്കാരനെ കസ്റ്റംസ് പ്രിവന്റീവ് വിഭാഗം ഓടിച്ചിട്ടു പിടികൂടി.
ഇന്നലെ രാവിലെ എയര്‍ഇന്ത്യ എക്‌സ്പ്രസിന്റെ ദുബൈ വിമാനത്തില്‍ കരിപ്പൂരിലെത്തിയ കാസര്‍കോട് സ്വദേശി അബ്ദുള്‍ റഹൂഫ് (54) നെയാണ് കസ്റ്റംസ് പ്രിവന്റീവ് വിഭാഗം പിടികൂടിയത്. കരിപ്പൂര്‍ കസ്റ്റംസിനേയും വെട്ടിച്ചു പുറത്തുകടന്ന ഇയാളില്‍ നിന്ന് 27 ലക്ഷത്തിന്റെ 938 ഗ്രാം സ്വര്‍ണം പിടിച്ചു. രഹസ്യവിവരത്തെ തുടര്‍ന്നാണ് കസ്റ്റംസ് പ്രിവന്റീവ് വിഭാഗം ഇയാളെ തടഞ്ഞത്.
വിമാനത്താവളത്തിലെ ഗേറ്റില്‍ വച്ച് പിടികൂടുന്നതിനിടെ ഇയാള്‍ കുതറിയോടി. ഇതോടെ ഇയാളെ വിമാനത്താവളത്തില്‍ ഓടിച്ചിട്ട് പിടിക്കുകയായിരുന്നു. നേര്‍ത്ത ഷീറ്റുകളാക്കി മാറ്റിയ സ്വര്‍ണം കളിപ്പാട്ടങ്ങളുടെ കാര്‍ട്ടണകത്ത് ഒളിപ്പിച്ചുവച്ച നിലയിലായിരുന്നു. പിടിയിലായ റഹൂഫ് സ്വര്‍ണക്കടത്ത് കാരിയറാണ്. കാസര്‍കോട് സ്വദേശി റഹീം എന്നയാളാണ് ഗള്‍ഫില്‍വച്ച് സ്വര്‍ണം നല്‍കിയതെന്ന് ഇയാള്‍ ചോദ്യം ചെയ്യലില്‍ പറഞ്ഞു. ഇയാളില്‍ നിന്ന് സ്വര്‍ണം വാങ്ങാനെത്തിയ കാസര്‍കോട് സ്വദേശി ഖാലിദും കസ്റ്റംസ് വിഭാഗത്തിന്റെ പിടിയിലായിട്ടുണ്ട്. പിടികൂടിയ സ്വര്‍ണത്തിന് ഇന്ത്യന്‍ വിപണിയില്‍ 27 ലക്ഷം വിലവരും.