പെരിന്തല്‍മണ്ണ: വനിതാ കമ്മിഷന്‍ അംഗം ഷാഹിദാ കമാലിനോട് ഓട്ടോ ഡ്രൈവര്‍ അപമര്യാദയായി പെരുമാറിയതായും വാഹനത്തില്‍ നിന്ന് ഇറക്കിവിടാന്‍ ശ്രമിച്ചതായും പരാതി. അങ്ങാടിപ്പുറം റെയില്‍വേ സ്റ്റേഷനിലെ ഓട്ടോ സ്റ്റാന്‍ഡിലാണ് സംഭവം. മലപ്പുറത്ത് നടക്കുന്ന വനിതാ കമ്മിഷന്‍ സിറ്റിങ്ങില്‍ പങ്കെടുക്കുന്നതിനായി ഇന്നലെ രാവിലെ അങ്ങാടിപ്പുറം റെയില്‍വേ സ്റ്റേഷനില്‍ എത്തിയപ്പോഴായിരുന്നു ഇത്.
രാവിലെ 6.30ഓടെ കൊച്ചുവേളി-നിലമ്പൂര്‍ രാജ്യറാണി എക്‌സ്പ്രസില്‍ അങ്ങാടിപ്പുറം റയില്‍വേ സ്റ്റേഷനില്‍ വന്നിറങ്ങി. തുടര്‍ന്ന് ഗസ്റ്റ്ഹൗസിലേക്ക് പോകാനായി ഓട്ടോയില്‍ കയറി. ഓട്ടോ ഗസ്റ്റ്ഹൗസിലേക്ക് വിടാന്‍ ആവശ്യപ്പെട്ടപ്പോഴാണ് ഡ്രൈവറുടെ മോശം പെരുമാറ്റമുണ്ടായത്. വാഹനം വഴിയില്‍ നിര്‍ത്തി ഇറങ്ങിപ്പോകാന്‍ ഡ്രൈവര്‍ ആക്രോശിച്ചതായും ഷാഹിദ കമാല്‍ പറഞ്ഞു.
ഡ്രൈവര്‍ ആക്രോശിച്ചപ്പോള്‍ താന്‍ വനിതാ കമ്മിഷന്‍ അംഗമാണെന്ന് ഷാഹിദ വെളിപ്പെടുത്തുകയായിരുന്നു. ഉടന്‍ പെരിന്തല്‍മണ്ണ സി.ഐയെ വിളിച്ച് ഡ്രൈവറുടെ ധിക്കാരപരമായ പെരുമാറ്റത്തെക്കുറിച്ച് പറയുകയും ചെയ്തു. സംഭവത്തെക്കുറിച്ച് വനിതാ കമ്മിഷന്‍ സ്വമേധയാ കേസ് രജിസ്റ്റര്‍ ചെയ്തതായി ഷാഹിദ കമാല്‍ പിന്നിട് മാധ്യമങ്ങളോട് പറഞ്ഞു. ഇന്ന് മലപ്പുറത്ത് നടക്കുന്ന വനിതാ കമ്മിഷന്‍ സിറ്റിങ്ങില്‍ ഓട്ടോയുമായി ഹാജരാകാന്‍ ഡ്രൈവറോട് ആവശ്യപ്പെട്ടിട്ടുണ്ട്.