കാസര്‍കോട്: വില്‍പനയ്ക്കായി എത്തിച്ച 500 കുപ്പി ഗോവന്‍ മദ്യവുമായി യുവാവ് അറസ്റ്റില്‍. തളങ്കര കൊപ്പല്‍ കോളനിയിലെ കീരി രമേശന്‍ എന്ന രമേശ(39)നെയാണ് എക്‌സൈസ് സംഘം പിടികൂടിയത്.
180 മി.ലിറ്ററിന്റെ 85 ലിറ്റര്‍ മദ്യമാണു പിടിച്ചത്. വീടിന്റെ അടുക്കളയുടെ സ്ലാബിനടിയിലും നാലു പ്ലാസ്റ്റിക് ചാക്കുകെട്ടിലും സഞ്ചിയിലും സൂക്ഷിച്ച നിലയിലായിരുന്നു മദ്യം. രഹസ്യവിവരത്തെ തുടര്‍ന്നാണ് എക്‌സൈസ് അധികൃതര്‍ റെയ്ഡ് നടത്തിയത്. കാസര്‍കോട് ടൗണ്‍, തളങ്കര, കറന്തക്കാട്, കേളുഗുഡ്ഡെ തുടങ്ങിയ സ്ഥലങ്ങളിലും റെയ്ഡ് നടത്തി.
ഗോവയില്‍ കുപ്പിയൊന്നിനു 21 രൂപ നിരക്കില്‍ വാങ്ങി 100 രൂപയ്ക്കു വില്‍പന നടത്തി അമിത ലാഭം കൊയ്യുകയാണു പ്രതിയെന്ന് എക്‌സൈസ് അധികൃതര്‍ പറഞ്ഞു. കോളനികളില്‍ മദ്യം വില്‍ക്കാന്‍ കൂട്ടുനില്‍ക്കുന്ന പ്രതികളെ കുറിച്ചും എക്‌സൈസ് അന്വേഷണം നടത്തുന്നുണ്ട്.
അടുത്തകാലത്തായി കാസര്‍കോട് നടക്കുന്ന ഏറ്റവും വലിയ ശേഖരമാണു പിടികൂടിയത്. പരിശോധനക്കു കാസര്‍കോട് എക്‌സൈസ് റേഞ്ച് ഇന്‍സ്‌പെക്ടര്‍ എ ജിജി പോള്‍, ഡെപ്യൂട്ടി എക്‌സൈസ് കമ്മിഷണര്‍ എന്‍.എസ് സുരേഷ്, അസിസ്റ്റന്റ് ഇന്‍സ്‌പെക്ടര്‍ വി അഷ്‌റഫ്, എം.സുകുമാരന്‍ നമ്പ്യാര്‍, പ്രിവന്റിവ് ഓഫിസര്‍മാരായ വി സുരേഷ്, ഉമ്മര്‍കുട്ടി നേതൃത്വം നല്‍കി.