ഹരാരെ: സിംബാബ്‌വെയ്‌ക്കെതിരേയുള്ള ആദ്യ ഏകദിനത്തില്‍ ഇന്ത്യക്ക് ഒന്‍പതു വിക്കറ്റിന്റെ ജയം. സിംബാബ്‌വെ ഉയര്‍ത്തിയ 169 റണ്‍സ് വിജയ ലക്ഷ്യം ലോകേഷ് രാഹു(100*)ലിന്റെ സെഞ്ച്വറിയുടെ മികവില്‍ മറികടക്കുകയായിരുന്നു ഇന്ത്യ. ജയത്തോടെ മൂന്നു മത്സരങ്ങളുടെ പരമ്പരയില്‍ 1-0നു മുന്നിലെത്താനും ഇന്ത്യക്ക് സാധിച്ചു. സ്‌കോര്‍ സിംബാബ്‌വെ 49.5 ഓവറില്‍ 168. ഇന്ത്യ 42.3ല്‍ ഒന്നിന് 173.

ടോസ് നേടിയ നായകന്‍ മഹേന്ദ്ര സിങ് ധോണി സിംബാബ്‌വെയെ ബാറ്റിങിനയക്കുകയായിരുന്നു. എന്നാല്‍ മൂര്‍ച്ചയേറിയ ഇന്ത്യന്‍ ബൗളിങിനു മുന്നില്‍ പിടിച്ചുനില്‍ക്കാന്‍ സിംബാബ്‌വെക്കായില്ല. എല്‍ട്ടന്‍ ചിഗുംബുര (41)യാണ് ടീമിന്റെ ടോപ് സ്‌കോറര്‍. ക്രെയ്ഗ് ഇര്‍വിന്‍(21) സിക്കന്ദര്‍ റാസ(23) എന്നിവരും ഭേദപ്പെട്ട പ്രകടനം കാഴ്ച്ചവച്ചു. നാലു വിക്കറ്റെടുത്ത ജസ്പ്രിത് ബുമ്‌റയാണ് സിംബാബ്‌വെയെ തകര്‍ത്തത്. ധവാല്‍ കുല്‍ക്കര്‍ണി, ബരീന്ദര്‍ സ്രാന്‍ എന്നിവര്‍ ഓരോ വിക്കറ്റെടുത്തു.

മറുപടി ബാറ്റിങില്‍ കരുണ്‍ നായര്‍(7) പെട്ടെന്ന് പുറത്തായെങ്കിലും അമ്പാട്ടി റായിഡു(62*) രാഹുല്‍ സഖ്യം പിരിയാത്ത മൂന്നാം വിക്കറ്റ് സഖ്യത്തില്‍ 162 റണ്‍സ് ചേര്‍ത്തു. രാഹുല്‍ 115 പന്തില്‍ ഏഴു ബൗണ്ടറിയും ഒരു സിക്‌സറുമടിച്ചു. രാഹുല്‍ തന്നെയാണ് കളിയിലെ താരവും.