അഹമ്മദാബാദ്: ഗുജറാത്തിലെ അഹമ്മദാബാദ് വിമാനത്താവളത്തില്‍ രണ്ട് വിമാനങ്ങള്‍ കൂട്ടിയിടിയില്‍ നിന്ന് ഒഴിവായത് തലനാരിഴക്ക്. സ്‌പൈസ് ജെറ്റ് വിമാനവും ഇന്‍ഡിഗോ വിമാനവുമാണ് ഇന്നലെ വിമാനത്താവളത്തില്‍ അപകടത്തില്‍പെടാതെ രക്ഷപ്പെട്ടത്.
റണ്‍വേയിലുണ്ടായിരുന്ന ഇന്‍ഡിഗോ വിമാനത്തെ മാറ്റുന്നതിന് മുന്‍പ് സ്‌പൈസ് ജെറ്റ് വിമാനത്തിന് പുറപ്പെടാന്‍ അനുമതി നല്‍കിയാതാണ് രണ്ട് വിമാനങ്ങളിലെ യാത്രക്കാരേയും വിമാനത്താവള അധികൃതരേയും മുള്‍മുനയിലാക്കിയത്.
റണ്‍വേയില്‍ എത്തിയ മുയലിനെ ഓടിക്കുന്നതിനായിട്ടാണ് ഇന്‍ഡിഗോ വിമാനം റണ്‍വേയില്‍ നിന്ന് മാറ്റാന്‍ കഴിയാതിരുന്നത്. 142 യാത്രക്കാരുമായി ഡല്‍ഹിയിലേക്ക് പോകാനായി സ്‌പൈസ് ജെറ്റിന് അനുമതി നല്‍കി. ഈ സമയത്ത് വിമാനം പുറപ്പെടുന്ന റണ്‍വേയില്‍ ഇന്‍ഡിഗോ വിമാനം പാര്‍ക്ക് ചെയ്തതായി കണ്ടതോടെ ഉടന്‍തന്നെ എയര്‍ട്രാഫിക് കണ്‍ട്രോള്‍ വിഭാഗം പൈലറ്റിനോട് ദിശമാറ്റാന്‍ ആവശ്യപ്പെടുകയായിരുന്നു.