കൊണ്ടോട്ടി: സംസ്ഥാന ഹജ്ജ് കമ്മിറ്റിക്കു കീഴില്‍ ഹജ്ജിന് അപേക്ഷിച്ചവരിലെ നറുക്കെടുപ്പ് ഇന്നു നടക്കും. ഉച്ചക്ക് രണ്ടിന് ഹജ്ജ് വകുപ്പ് മന്ത്രി കെ.ടി ജലീല്‍ ഉദ്ഘാടനം ചെയ്യും.

കേരളത്തില്‍ ഈവര്‍ഷം 43,115 ഹജ്ജ് അപേക്ഷകരാണുള്ളത്. സംസ്ഥാന ഹജ്ജ് കമ്മിറ്റിക്ക് ലഭിച്ചത് 11,472 ഹജ്ജ് സീറ്റുകളാണ്. ഇവരില്‍ 70 വയസിന് മുകളില്‍ പ്രായമുള്ളവരുടെ വിഭാഗത്തില്‍ പെട്ട 1199 പേര്‍ക്കും 45 വയസിന് മുകളില്‍ പ്രായമുള്ള പുരുഷന്മാരില്ലാതെ ലേഡീസ് വിതൗട്ട് മെഹ്‌റം വിഭാഗത്തില്‍ അപേക്ഷിച്ച 2011 സ്ത്രീകള്‍ക്കും നറുക്കെടുപ്പില്ലാതെ അവസരം ലഭിക്കും.

ശേഷിക്കുന്ന 8262 പേരെ നറുക്കെടുപ്പിലൂടെ തിരഞ്ഞെടക്കും. നറുക്കെടുപ്പില്‍ അവസരം ലഭിക്കാത്തവരെ ഉള്‍പ്പെടുത്തി വെയ്റ്റിങ് ലിസ്റ്റ് തയാറാക്കും. സംസ്ഥാനത്തിന് കൂടുതല്‍ ഹജ്ജ് സീറ്റുകള്‍ ലഭിക്കുന്ന പക്ഷം വെയ്റ്റിങ് ലിസ്റ്റിലെ മുന്‍ഗണനാ ക്രമത്തില്‍ ഹജ്ജിന് അവസരം നല്‍കും.