എടവണ്ണ: കുണ്ടുതോട് അങ്ങാടിക്ക് സമീപത്ത് പി.ടി വി ഫര്‍ണിച്ചറിനോട് ചേര്‍ന്ന മരമില്ലിന് തീപിടിച്ചു. പുലര്‍ച്ചെ ആറോടെ തൊഴിലാളികള്‍ എത്തിയപ്പോഴാണ് തീ പടര്‍ന്നത് കണ്ടത്.
ഉടനെ തൊട്ടടുത്ത മസ്ജിദില്‍ നിന്നും വെള്ളം കൊണ്ട് വന്ന് നാട്ടുകാരും നിലമ്പൂര്‍, തിരുവാലി ഫയര്‍ഫോഴ്‌സും ചേര്‍ന്ന് തീ അണച്ചതിനാല്‍ വന്‍ ദുരന്തം ഒഴിവായി. മില്ലിന്റെ ഓഫിസ് മുറി പൂര്‍ണമായും മില്ല് ഭാഗീകമായും കത്തിനശിച്ചു. വി.പി അബൂബക്കറിന്റെ ഉടമസ്ഥതയിലുള്ള മില്ല് പള്ളിത്തൊടിക വേലായുധനാണ് നടത്തിപ്പിന്റെ ചുമതല. രണ്ടുലക്ഷം രൂപയുടെ നഷ്ടം കണക്കാക്കുന്നതായി ബന്ധപ്പെട്ടവര്‍ പറഞ്ഞു. പരിസരത്ത് സാമൂഹ്യവിരുദ്ധരുടെ ശല്യമുള്ളതായും ഉപേക്ഷിച്ച സിഗിരറ്റ് കുറ്റിയില്‍ നിന്നുമാകാം തീ പടര്‍ന്നതെന്നാണ് പ്രാഥമിക നിഗമനം.
എടവണ്ണ എസ്.ഐ.ബിനു തോമസിന്റെ നേതൃത്വത്തിലുള്ള പൊലിസും സ്ഥലത്തെത്തി.