കോട്ടക്കല്‍: 'സമസ്ത ശൈഥില്യമല്ല, സമാധാനമാണ്' എന്ന പ്രമേയത്തില്‍ മലപ്പുറം ജില്ലാ ദാരിമീസ് അസോസിയേഷന്‍ സംഘടിപ്പിക്കുന്ന ആദര്‍ശ സമ്മേളനവും സമസ്ത നേതാക്കള്‍ക്ക് സ്വീകരണവും നാളെ കോട്ടക്കല്‍ ബസ് സ്റ്റാന്‍ഡ് പരിസരത്ത് നടക്കും. വൈകുന്നേരം 4.30ന് മജ്‌ലിസുന്നൂര്‍ സദസോടെ പരിപാടിക്ക് തുടക്കമാകും. സമസ്ത കേന്ദ്ര മുശാവറ അംഗം എ മരക്കാര്‍ ഫൈസി നിറമരതൂര്‍ ഉദ്ഘാടനം ചെയ്യും. സയ്യിദ് റഷീദലി ശിഹാബ് തങ്ങള്‍ അധ്യക്ഷനാകും.
സമസ്ത പ്രസിഡന്റ് സയ്യിദ് ജിഫ്‌രി മുത്തുക്കോയ തങ്ങള്‍, ജന.സെക്രട്ടറി പ്രൊഫ.കെ ആലിക്കുട്ടി മുസ്‌ലിയാര്‍, ട്രഷറര്‍ സി.കെ.എം സാദിഖ് മുസ്‌ലിയാര്‍, അത്തിപ്പറ്റ മൊയ്തീന്‍കുട്ടി മുസ്‌ലിയാര്‍, ഡോ.ബഹാഉദ്ദീന്‍ നദ്‌വി കൂരിയാട്, എ.വി അബ്ദുറഹിമാന്‍ മുസ്‌ലിയാര്‍, പ്രൊഫ.കെ.കെ ആബിദ് ഹുസൈന്‍ തങ്ങള്‍ എം.എല്‍.എ, കെ.കെ നാസര്‍ എന്നിവര്‍ സംബന്ധിക്കും. എം.ടി അബൂബക്കര്‍ ദാരിമി, അലവി ദാരിമി കുഴിമണ്ണ എന്നിവര്‍ വിഷയാവതരണം നടത്തും. ദാരിമീസിനു കീഴില്‍ സമസ്ത പ്രസിഡന്റ് ജിഫ്‌രി മുത്തുക്കോയ തങ്ങള്‍ നേതൃത്വം നല്‍കുന്ന മതബിരുദധാരികള്‍ക്കായി മലപ്പുറത്ത് ആരംഭിക്കുന്ന പണ്ഡിത ദര്‍സിന്റെ പ്രഖ്യാപനവും നടത്തുമെന്ന് ഭാരവാഹികള്‍ അറിയിച്ചു.
വാര്‍ത്താസമ്മേളനത്തില്‍ സയ്യിദ് ഫഖ്‌റുദ്ദീന്‍ ഹസനി തങ്ങള്‍ കണ്ണന്തളി, മുഹമ്മദലി ദാരിമി കരേക്കാട്, അബ്ദുല്‍ കരീം ബാഖവി ഓമാനൂര്‍, കബീര്‍ ദാരിമി കുറ്റിപ്പുറം എന്നിവര്‍ പങ്കെടുത്തു.