സെമിനാര്‍ ഇന്ന്

ശ്രീകൃഷ്ണപുരം : എനര്‍ജി മാനേജ്മന്റ് സെന്റര്‍ ബ്യൂറോ ഓഫ് എനര്‍ജി എഫിഷന്‍സി സംഘടിപ്പിക്കുന്ന ഊര്‍ജ സെമിനാറും പോസ്റ്റര്‍ പ്രദര്‍ശനവും ഇന്ന് രാവിലെ 10നു ശ്രീകൃഷ്ണപുരം ഗ്രാമ പഞ്ചായത്ത് ഹാളില്‍ നടക്കും.ഊര്‍ജ സംരക്ഷണം എന്ന വിഷയത്തില്‍ ബി.ആര്‍.സി ട്രെയ്‌നര്‍ ഡോ.എന്‍.വി ജയരാജ് ക്ലാസ് എടുക്കും.പി ഉണ്ണി എം.എല്‍.എ ഉല്‍ഘാടനം ചെയ്യും.ഗ്രാമ പഞ്ചായത്ത് മുഖേന അനെര്‍ട്ടിന്റെ ഉല്‍പ്പന്നമായ സോളാര്‍ ലാന്റേണ്‍ സബ്‌സിഡി നിരക്കില്‍ ലഭിക്കുന്നതിനായി ബുക്ക് ചെയ്യാനുള്ള സൗകര്യം ഉണ്ടാവും.

മുക്കാരത്തിക്കാവ് ഭഗവതിക്ഷേത്രം ദേശഗുരുതി ഇന്ന്

ആനക്കര : ഞാങ്ങാട്ടിരി മുക്കാരത്തിക്കാവ് ഭഗവതിക്ഷേത്രത്തില്‍ ദേശഗുരുതി ഇന്നു നടക്കും. വൈകീട്ട് അഞ്ചരമുതല്‍ ഗുരുതി ചടങ്ങുകള്‍ ആരംഭിക്കും. ക്ഷേത്രത്തിലെ കൂത്തുതാലപ്പൊലി കഴിഞ്ഞ് നട തുറക്കുകയാണ് ഇന്ന്. ദേശങ്ങളുടെയും ഭക്തജനങ്ങളുടെയും രക്ഷയ്ക്കും ഐശ്വര്യത്തിനുമായി ഭഗവതിക്കും ഭൂതഗണങ്ങള്‍ക്കും പരിവാരപ്രീതിക്കുമായി നടത്തുന്ന യജ്ഞമാണ് ദേശഗുരുതിയെന്നതാണ് വിശ്വാസികളുടെ സങ്കല്‍പ്പം. ക്ഷേത്രത്തിന്റെ വടക്കേ നടയില്‍ തയ്യാറാക്കിയ ഗുരുതിപന്തലില്‍ കളം വരച്ചലങ്കരിച്ച് അത്താഴ പൂജയ്ക്കുശേഷം തന്ത്രിമാരായ ആഞ്ഞം മധുസൂധനന്‍ നമ്പൂതിരിയും അണ്ടലാടി പരമേശ്വരന്‍ നമ്പൂതിരിപ്പാടും ചേര്‍ന്ന് ഭഗവതിയെയും ഭൂതഗണങ്ങളെയും ആവാഹിച്ച് പ്രത്യേക പൂജകള്‍ ചെയ്ത ശേഷം ഭഗവതിയുടെ പ്രതിരൂപമായ കോമരത്തിന്റെ സാന്നിധ്യത്തില്‍ ഗുരുതി തര്‍പ്പണം നടത്തും.

പൊട്ടച്ചിറ എം.ടി.ഐ. സ്‌കൂള്‍ വാര്‍ഷികം

നെല്ലായ: പൊട്ടച്ചിറ എം.ടി.ഐ. സെന്‍ട്രല്‍ സ്‌കൂള്‍ ഇരുപത്തിനാലാം വാര്‍ഷികം സമാപിച്ചു. വാര്‍ഷിക സമ്മേളനം സ്‌കൂള്‍ കമ്മിറ്റി ട്രഷറര്‍ സി.എ.എം.എ. കരീം ഉദ്ഘാടനം ചെയ്തു. വൈസ് പ്രസിഡന്റ് മരക്കാര്‍ മാരായമംഗലം അധ്യക്ഷനായി. പി.കെ.ശശി എം.എല്‍.എ. മുഖ്യാതിയായി. പ്രിന്‍സിപ്പല്‍ പി.ഉണ്ണികൃഷ്ണന്‍ റിപ്പോര്‍ട്ട് അവതരിപ്പിച്ചു. ഗ്രാമപഞ്ചായത്ത് അംഗം അസ്മിയ മുഹമ്മദലി, പി.ടി.എ. പ്രസിഡന്റ് ടി.ടി.അബൂബക്കര്‍ എന്ന മുത്തു ഹാജി, സ്‌കൂള്‍ ജോ.സെക്രട്ടറിമാരായ കെല്ല മുഹമ്മദ്, അഡ്വ: മുഹമ്മദലി മാറ്റാംതടം, കെ. അബൂബക്കര്‍, മുഹമ്മദലി അന്‍വരി പ്രസംഗിച്ചു. വിവിധ പരീക്ഷകളിലും മത്സരങ്ങളിലും വിജയികളായവരെ അനുമോദിച്ചു. അസുഖ ബാധിതയായ യു.കെ.ജി.വിദ്യാര്‍ത്ഥിക്കുള്ള പത്താംക്ലാസ് വിദ്യാര്‍ത്ഥികള്‍ സ്വരൂപിച്ച ധന സഹായം പ്രിന്‍സിപ്പല്‍ പി.ഉണ്ണികൃഷ്ണന് കൈമാറി. പി.ടി.എ. വൈസ് പ്രസിഡന്റ് കെ.ടി.അഷ്‌റഫ് സ്വാഗതവും സ്‌കൂള്‍ ജോ.സെക്രട്ടറി ഒ.കെ. മൊയ്തു നന്ദിയും പറഞ്ഞു