തൃശൂര്‍: മണ്ണുത്തി മുല്ലക്കരയില്‍ പ്രഭാത സവാരിക്കിറങ്ങിയ വയോധികയെ സംഘ്പരിവാര്‍ പ്രവര്‍ത്തന്‍ ആക്രമിച്ചു. തോട്ടപ്പടി കൊളങ്ങര വീട്ടില്‍ അബൂബക്കറിന്റെ ഭാര്യ ജമീല (63)യെയാണ് സംഘ്പരിവാര്‍ പ്രവര്‍ത്തകനായ തോട്ടപ്പടി കോക്കാട്ടില്‍ ബാബു (ബാബുട്ടന്‍) ആക്രമിച്ചത്. ഇന്നലെ രാവിലെ ഏഴരയോടെയാണ് സംഭവം. ഇയാള്‍ക്കെതിരേ മണ്ണുത്തി പൊലിസ് കേസെടുത്തു.

ഇയാള്‍ മുടിയില്‍ കുത്തിപ്പിടിച്ച് മുഖത്ത് അടിക്കുകയായിരുന്നെന്ന് ജമീല പറഞ്ഞു. 'നിങ്ങളൊക്കെ ഇവിടെ നിന്ന് പോകണ'മെന്ന് ആക്രോശിച്ചായിരുന്നു ആക്രമണം. ജമീലയെ മുളങ്കുന്നത്തുകാവ് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.

നടക്കാനിറങ്ങിയ ജമീലയെ ബാബു തടഞ്ഞുനിര്‍ത്തി ആക്രമിക്കുകയായിരുന്നു. ഓടിക്കൂടിയ നാട്ടുകാര്‍ ഇവരെ രക്ഷിക്കുകയായിരുന്നു. മദ്രസയില്‍ പോവുന്ന കുട്ടികളെയും ബാബു ഭീഷണിപ്പെടുത്തുന്നതായി പരാതിയുണ്ട്.