പെരിന്തല്‍മണ്ണ: യുവാവിനെ മര്‍ദിച്ച് വാഹനവും രേഖകളും തട്ടിയെടുത്തു. ആനമങ്ങാട് മണലായ തൂളിയത്ത് ബഷീര്‍ എന്ന യുവാവിനെയാണ് ഒറ്റപ്പാലം ലോഡ്ജിലേക്ക് വിളിച്ചുവരുത്തി പണവും സ്വത്തുക്കളും ആവശ്യപ്പെട്ട് മര്‍ദിച്ചത്. മണലായയിലെ വീട്ടില്‍ തിരിച്ചെത്തിച്ച സംഘം കാറും രേഖകളും തട്ടിയെടുക്കുകയായിരുന്നുവെന്ന് യുവാവ് പരാതിപ്പെട്ടു പാസ്‌പോര്‍ട്ട് വെരിഫിക്കേഷന് ഉണ്ടെന്നു പറഞ്ഞാണ് ബഷീറിനെ ഒറ്റപ്പാലത്തെ ലോഡ്ജിലേക്ക് വിളിച്ചുവരുത്തിയത്. വെള്ളിയാഴ്ച നാലോടെ ഒറ്റപ്പാലത്തെ ലോഡജിലെത്തിയ തന്നെ പണവും വീടിന്റെ ആധാരവും ചെക്കുകളും ആവശ്യപ്പെട്ട് പത്തോളം പേരടങ്ങുന്ന സംഘം മര്‍ദിച്ചതായി ബഷീര്‍ പറഞ്ഞു.
നഗ്നഫോട്ടോയെടുത്തും തോക്കു ചൂണ്ടിയും ഭീഷണിപ്പെടുത്തി ശനിയാഴ്ച പുലര്‍ച്ചെവരെ മര്‍ദനം തുടര്‍ന്നതായി ബഷീര്‍ പറഞ്ഞു. വിദേശത്ത് വച്ചുണ്ടായ ചില തര്‍ക്കങ്ങളാണ് സംഭവത്തിന് കാരണമായി പറയുന്നത്. ബഷീറിന്റെ അമ്മാവന്റെ മകന്‍ ജിഷാദിന്റെ നേതൃത്വത്തില്‍ മര്‍ദിച്ചുവെന്നാണ് പരാതി. ശനിയാഴ്ച പുലര്‍ച്ചെ ആറോടെ മണലായയിലെ വീട്ടില്‍ മകനെ എത്തിച്ച് സംഘം വീണ്ടും മര്‍ദിച്ചതായും ബഷീറിനെ മാതാവ് പറഞ്ഞു. മകനെ മര്‍ദിക്കുന്നത് തടയാന്‍ ശ്രമിച്ചപ്പോള്‍ ഇവര്‍ക്കും മര്‍ദനമേറ്റെന്നും പറയുന്നു. പരുക്കേറ്റ ഇയാളെ പെരിന്തല്‍മണ്ണ ജില്ലാ ആശുപത്രിയില്‍ പ്രവേശിപ്പിച്ചിരിക്കുകയാണ്. പരാതി നല്‍കി.യിട്ടുണ്ട്.